झापामा ठुलो परिणामको विस्फोटक पदार्थ बरामद




झापा, २३ असोज । दसैं सकिए लगतै तिहार तथा छठ पर्वलाई लक्षित गरी झापाका सीमावर्ती नाकाबाट बारुद जन्य पटका (विस्फोटक पदार्थ) भित्रिन थालेको छ ।

नेपालमा प्रतिबन्धित बारुद जन्य पटका तस्कर समूहले चोरी निकासीको बाटो प्रयोग गरेर नेपाल भित्राउन थालेको हो । झापाको कचनकवल नाकाबाट भित्राइएको ठुलो परिणामको पटकासहित एउटा मोटरसाइकललाई सशस्त्र प्रहरीले नियन्त्रणमा लिएको छ । हल्दीबारी गाउँपालिका ५ स्थित डाँगागाँउबाट दुई बोरा जगमग पटकासहित मोटरसाइकल नियन्त्रणमा लिएको सशस्त्र प्रहरी बल २ नम्बर गण झापाका सशस्त्र प्रहरी नायव उपरीक्षक प्रेम भण्डारीले जानकारी दिनुभयो ।

मे १ प ३७१३ नम्बरको मोटरसाइकलमा हालेर बिर्तामोडतर्फ लैजाने क्रममा सशस्त्र प्रहरीले विशेष सूचनाको आधारमा पटका बरामद गरेको हो । बरामद पटकाको बजार मूल्य एक लाख रुपैयां रहेको छ ।

बरामद पटकालाई आज बिहान सशस्त्र प्रहरी बल २ नम्बर गण झापामा नष्ट गरिएको छ । बरामद मोटरसाइकललाई भने आवश्यक कारबाहीका लागि भन्सारमा बुझाइने सशस्त्र प्रहरी नायव उपरीक्षक भण्डारीले बताउनुभयो ।

    Comment Here!


सम्बन्धित समाचार

View All