दाङ , १६ असोज । पछिल्लो समय दाङमा एकपछि अर्काे शैक्षिक संस्था थपिदै जादाँ जिल्ला नै शैक्षिक हव बन्दै गएको छ । दाङमा त्रिभुवन विश्वविद्यालयको प्रदेशस्तरीय इञ्जिनियरिङ क्याम्पस सञ्चालन हुने भएको छ । सातवटै प्रदेशमा सरकारी इञ्जिनियरिङ क्याम्पस सञ्चालन गर्ने सरकारको योजनाअनुसार यो वर्ष प्रदेश २, ५ र ७ मा नयां क्याम्पस थपिएको हो ।

सरकारी क्याम्पसमा इन्जिनियरिङ पढाई हुने भएपछि बिद्यार्थी र अभिभाबक खुसी भएका छन् । त्रिभुवन विश्वविद्यालयको ईन्जिनियरिङ क्याम्पस पश्चिम नेपाल मै नभएको बेला दाङमा संचालन हुनु आफैमा गरिमाको विषय बनेको छ । दाङमा प्रदेश ५ को इञ्जिनियरिङ क्याम्पस आएको भएपनि दीगो रुपमा चलाउने सक्ने इच्छाशक्ति भने देखिन आवश्यक छ । क्याम्पसमा राजनीति धेरै हुने भएकाले राजनीतिको चपेटामा नपारी दिर्घकालीन रुपमा क्याम्पस संचालन गर्ने वातावरण बनाउनुपर्ने विद्यार्थीहरु बताउंछन् ।

क्याम्पस स्थापना गर्नको लागि दुई पटकको सम्भाव्यता अध्ययनपछि प्रदेश ५ को दाङमै उपयुक्त हुने देखिएपछि इन्जिनियरिङ क्याम्पस स्थापना भएको हो । पर्याप्त जग्गा भएको त्रिभुवन विश्वविद्यालको आंगिक क्याम्पस महेन्द्र बहुमुखीकै नयां संकायको रुपमा राख्न सहज हुने प्रतिवेदन आएपछि सरकारले सोहीअनुसार निर्णय गरेको शिक्षा अभियन्ता तथा नेकपाका नेता जीवन गौतम बताउंछन् ।

अहिले त्रिभुवन विश्वविद्यालयका चारवटा इञ्जिनियरिङ क्याम्पस चलिरहेका छन् । पुलचोक, थापाथली, पोखरा र धरानमा त्रिविका इञ्जिनियरिङ क्याम्पस रहेका छन् । दाङमा इञ्जिनियरिङ कक्षा सञ्चालन भयो भने पनि सोहीस्तरको पढाई एकै शुल्कमा दाङमा हुनेछ । क्याम्पसका लेखा अधिकृत लक्ष्मण अधिकारीले आर्थिक वर्ष २०७४/०७५ को वार्षिक बजेटमा सरकारले सातै प्रदेशमा इञ्जिनियरिङ क्याम्पस पु¥याउने उल्लेख गरेपछि प्रक्रिया अघि बढाउन थप सहज भएको जानकारी दिए ।

त्यसैगरी वर्तमान सरकार बनेसंगै इञ्जिनियरिङ क्याम्पस नखुलेका प्रदेशमा सञ्चालनका लागि सभाव्यता अध्ययन गर्न कार्यदल बनेको थियो । कार्यदलले भौगोलिक अवस्थिति र वातावरणीय दृष्टिले प्रदेश ५ को सरकारी इञ्जिनियरिङ क्याम्पस सञ्चालन गर्न दाङमै उपयुक्त हुने प्रतिवेदन दिएको थियो ।

सोही आधारमा आयोगका सदस्य सचिव प्रा. डा. देवराज अधिकारीको संयोजकत्वमा समिति बनाई आयोगले दोस्रोपटक सम्भाव्यता अध्ययन गरेको थियो । चालु आर्थिक वर्षको बजेटमा प्रदेश २, ५ र ७ मा नयाँ इञ्जिनियरिङ क्याम्पसको विस्तृत परियोजना प्रतिवेदन (डिपिआर) निर्माणका लागि ८९ लाख ८० हजार बजेट विनियोजन गरेको महेन्द्र बहुमुखी क्याम्पसका सहायक क्याम्पस प्रमुख निश्चल हमालले बताए ।
क्याम्पसलाई स्थायित्व दिनको लागी दाङबासी लगायत क्याम्पस प्रशासन, अभिभावक, विद्यार्थी र सरकारले ध्यान दिन भने आवश्यक छ ।