पाल्पा,१० असोज  । पाल्पाको रम्भापानी मन्दिर मा रहेको मूर्ती जोगाउने उपाए अपनाउन थालेको करिव ४४ बर्ष पुग्न थाल्यो । मुर्ती चोरि हुने डरले आजको दिनसम्म पनि मुर्ती घरमै लगेर राख्ने चलन यथावत रहेको छ ।

पाल्पाको रम्भा गाउँपालिका–५, ताहुँमा रम्भादेवीको मन्दिर रहेको छ । धार्मिक र पर्यटनका हिसावले रम्भापानी मन्दिरको महत्व निकै ठुलो रहेको छ । मन्दिरमा देवीदेवताको मूर्ति राखेपछि सकेसम्म त्यहाँ बाट झिकेर अन्यत्र लगिदैन भन्ने मान्यता भएता पनि रम्भादेवी मन्दिरका पुजारीहरुले पुजापाठ सकेर दिनहुँ मूर्ती डोकोमा बोकेर घरमै लैजाने गरेका छन् । मन्दिर नजिककैको ताहुँ बजारमा मुर्ति लाने गरिएको छ ।

२०३२ सालमा सुनको जलप लगाएको रम्भादेविको मूर्ती मन्दिरबाटै चोरी भएपछि सुरक्षाका लागि पुजारीहरुले डोकोमा बोकेर मूर्ति ल्याउने र लैजाने गर्दै आएका हुन् । मन्दिरका दुई जना पुजारी मध्ये एक जनाले मूर्ती र शीला बोकेर मन्दीरमा आउँछन् । अर्का पुजारीले अक्षता घर– घरमा उठाउँदै मन्दिर पुग्ने गर्छन् ।पाल्पा, स्याङजा, गुल्मी, अर्घाखाची, रुपन्देही लगायतका जिल्लाका वासिन्दाका लागि रम्भा देवी मन्दिर महत्वपूर्ण तीर्थस्थलका रुपमा रहेको छ । बस्तिदेखी टाढाको घना जंगलको वीचमा रम्भापानीको मन्दिर रहेकोले पनि रातीको समयमा मुर्ती चोरी हुने गरेको बताउ“छन् रम्भादेवी पर्यटन विकास प्रतिष्ठान पाल्पाका अध्यक्ष बिनोद श्रेष्ठ ।

बाह्रै महिना शीतल हुने यस रम्भादेवी मन्दिर क्षेत्रलाई पर्यटकीय क्षेत्रका रुपमा विकास गरि प्रशस्त आम्दानी लिन सकिने स्थानीय वासिन्दा बताउ“छन् । मन्दिरमा छिमेकी जिल्ला स्याङ्जा, गुल्मी, अर्घाखाँची, पर्वत, रुपन्देही, नवलपरासीका साथै भारतका तिर्थालुहरु समेत आउने गरेका छन् । ऐतिहासिक, धार्मिक, सांस्कृतिक तथा पर्यटकीय महत्वले धनी रम्भादेवी मन्दिर जिल्ला सदरमुकाम तानसेनदेखि करिब ३१ किलोमिटर पूर्वको रम्भापानीको जङ्गलभित्र अवस्थित रहेको छ । मन्दिरको महत्व अनुसार स्थानीय तहले सुरक्षाको ब्यावस्था गर्न सकेमा दैनिक मुर्ती घरमा लानु पर्ने समस्या हटेर जाने थियो कि ?