काठमाडौं, ८ भदौ ।  भारतका पूर्व वित्तमन्त्री एवं भारतीय जनता पार्टीका वरिष्ठ नेता अरुण जेटलीको आइतबार अन्तिम संस्कार गरिएको छ । भारतको राजधानी दिल्लीस्थित यमुना नदी किनारको निगमबोध घाटमा जेटलीका पुत्र रोहनले दागबत्ती दिएका थिए । अन्तिम संस्कारमा उपराष्ट्रपति वैंकेया नायडु, गृहमन्त्री तथा भाजपाका अध्यक्ष अमित शाह तथा रक्षामन्त्री राजनाथ सिंहलगायत भाजपा तथा विपक्षी दलका नेता तथा कार्यकर्ता उपस्थित थिए ।

यस्तै, योग गुरु स्वामी रामदेव, पूर्व क्रिकेटर तथा सांसद गौतम गम्भीर, दिल्लीका मुख्यमन्त्री अरविन्द केजरीवाल, उप मुख्यमन्त्री मनिष सिसोदिया, कांग्रेस नेता कपिल सिब्बललगायत पनि अन्तिम विदाईका लागि निगमबोध घाट पुगेका थिए । यसअघि अन्तिम श्रद्धाञ्जलीका लागि जेटलीको पार्थिव शरीर भाजपाको पार्टी कार्यालयमा राखिएको थियो । भारतीय प्रधानमन्त्री नरेन्द्र मोदी विदेश भ्रमणका क्रममा बहराइनमा रहेकाले जेटलीको अन्तिम श्रद्धाञ्जलीमा सहभागी हुन पाएनन् । यद्यपि, विदेश भ्रमणकै क्रममा पनि जेटलीको निधनले आफू अत्यन्तै दुखी भएको भन्दै केही दिन अघि मात्रै सुष्मा स्वराजलाई गुमाउन पुगेको र अहिले आफ्ना मित्र अरुणले पनि छाडेर गएको प्रधानमन्त्री मोदीले बताएका छन् । पार्टी कार्यालयमा अन्तिम श्रद्धाञ्जलीपछि निमगबोध घाटसम्म शव यात्रा गरिएको थियो ।

आठ किलोमिटर दूरी पार गर्न एक घण्टा लागेको थियो । मिर्गौला प्रत्यारोपण गरेका जेटली पछिल्लो समय भने क्यान्सर पीडित थिए । लामो समयदेखि बिरामी जेटलीको शनिबार दिउँसो दिल्लीस्थित अखिल भारतीय आर्युविज्ञान संस्थान (एम्स) अस्पतालमा उपचारका क्रममा ६६ वर्षको उमेरमा निधन भएको थियो ।