जनकपुर,२१ जेठ । प्रदेश २ का मुख्यमन्त्री लालबाबु राउतले दलित समुदायलाई नेतृत्वमा नल्याए सम्म दलितको अवस्था नफेरिने बताएका छन् । दलित समुदायको वर्तमान आर्थिक, सामाजिक अवस्थाबारे चर्चा गर्दै मुख्यमन्त्री राउतले दलित समुदायलाई नेतृत्वमा नल्याए सम्म अवस्था परिर्वतन हुन नसकिने जिकिर गरेका छन् ।

छुवाछुत मुक्त राष्ट्र नेपाल घोषणा दिवसको अवसरमा दलित सम्बद्ध संघ संस्थाहरुले मंगलबार जनकपुरमा आयोजना गरेको प्रदेश स्तरीय दलित अगुवा भेलालाई सम्बोधन गर्दै मुख्यमन्त्री राउतले दलित समुदायको अधिकार प्राप्तीको लागि र आर्थिक, सामाजिक परिर्वतनको लागि नेतृत्वमा ल्याउन जोड दिएको हो ।
प्रदेश सरकार दलित मैत्री रहेको दावी गर्दै दलितहरुको लागि दलित सशक्तिकरण ऐन, छात्रवृति योजना, दलित छात्रावासको निर्माण जस्ता योजना लिएर अगाडी बढेको बताए । ‘सदनमा छलफलको क्रममा रहेको दलित सशक्तिकरण ऐन विश्वकै नमूना रहेको छ,’ उनले भने, ‘ऐन पारित भएपछि दलितहरुको स्वास्थ्य, शिक्षाको व्यवस्था सुनिश्चित हुन्छ ।’

दलितहरुले विश्वासको अधारमा दिएको मत संघिय सरकारले विश्वासघात गरेको भन्दै अवको दिनमा को आफ्नो र को पराया भन्ने कुरा छुटयाउनु पर्ने तर्क गरे ।
दलित समुदायको अवस्था परिर्वतन गर्न नीति नियम आवश्यक रहेको भन्दै उनीहरुको आर्थिक समृद्धिको लागि प्रदेश सरकारले लोकसेवा र प्रदेश प्रहरी ऐनमा १८ प्रतिशत आरक्षणको व्यवस्था गरेको उनले दावी गरे ।

दलित समुदाय शिक्षा, स्वास्थ्य लगायत विकासको क्षेत्रमा पछाडी रहेको उल्लेख गर्दै प्रदेश सरकारले सबै क्षेत्रमा अगाडी बढाउन जोड दिएको ओल्याए ।
दलित अगुवा उमेश विसुन्केको अध्यक्षतामा भएको कार्यक्रममा वरिष्ठ पत्रकार चन्द्र किशोर सहित प्रदेश भरिका दलित अगुवाहरुको उपस्थिति रहेको थियो ।