एजेन्सी,११ माघ । कुर्दिस पिपुल्स् पार्टी (एचडिपी) का एक सांसदलाई टर्कीको एक अदालतले रिहा गर्न आदेश दिएको छ ।

एघार हप्ताको भोक हड्तालपछि गम्भीर बिरामी भएकी ती सांसदलाई रिहाइको आदेश अदालतले दिएको हो । लेला गुभेन नामक ती सांसदले गत नोभेम्बर ८ बाट भोक हड्ताल शुरु गरेकी थिइन् ।

उनले कारागारामा राखिएका कुर्दिस वरिष्ठ नेता अब्दुल्लाह ओकालानले सामना गर्नुपरेको विषम परिस्थितिको विरोधमा सो भोक हड्ताल शुरु गरेकी समाचारमा बताइएको छ ।

कुर्दिसहरुको बाहुल्यता रहेको दक्षिणपश्चिमी शहर दियार्बाकिरमा रहेको एक अदालतले गुभेनलाई तत्कालै रिहा गर्न आदेश दिएको हो । तर अदालतले गुभेनलाई समुद्रपारका देशहरुको यात्रामा जान भने प्रतिबन्ध लगाएको छ । गुभेनको आगामी सुनवाई मे २९ मा रहेको छ ।

सिरियामा कुर्दिसहरुको संघर्षका विरुद्ध टर्कीको सेनाले गरेको कारबाहीको आलोचना गरेको आरोपमा गुभेनलाई सन् २०१८ को जनवरीमा पक्राउ गरिएको थियो ।