काठमाडौं,१ कात्तिक । काठमाडौंको हनुमानढोकास्थित तलेजु भवानीको मन्दिर आज सर्वसाधारणका लागि खुला गरिएको छ ।

त्येक वर्ष दशैको नवमीका दिन मात्र सर्वसाधारणका लागि खुला गरिने मन्दिरमा आज दर्शनार्थीको घुइँचो लागेको छ । आजका दिन तलेजु भवानीको दर्शन गरेमा सुख, शान्ति तथा पारिवारिक समृद्धि कायम हुने जनविश्वास रही आएको छ ।

यसैगरी, सोही मन्दिर नजिकै गएराति ५४ बोका तथा ५४ राँगाको बलि दिएर कालरात्रि मनाइएको छ । कालरात्रिका दिन सरकारी स्तरबाट नै मन्दिरमा बलि दिने प्रचलन छ । तलेजु भवानीलाई मल्ल राजाहरूको इष्टदेवीका रुपमा मान्दै पुजा गर्ने गरेको पाइन्छ ।

यस्तै कर्नाटवंशी राजा हरिहरसिंह देवले तलेजु भवानी उपत्यकामा ल्याएको पनि इतिहासमा उल्लेख छ । सन् १३२५ मा भारतीय मुसलमान शासकले हरिहरसिंहको राज्य सिम्रौनगढमा आक्रमण गरेपछि आक्रमणबाट बच्न उनी देवीसहित भक्तपुर आएको इतिहासमा उल्लेख छ ।

वसन्तपुरका साथै कीर्तिपुर, फर्पिङ, साँखु, ठिमी, चापागाउँ, नुवाकोट, दोलखा, बनेपा, पनौतीलगायत ठाउँमा पनि तलेजु भवानीको पूजा आराधना गरिन्छ । राजा रत्न मल्लले सबैभन्दा पहिले भवानीको मन्दिर बनाएको भए पनि पछि विसं १६२० मा महिन्द्र मल्लले अहिलेको यो मन्दिर बनाएका हुन् । यही मन्दिरको माथिल्लो तलाबाट राजा महिन्द्र मल्लले जनताको घरमा धुरीबाट धुवाँ निस्किएको हेरेपछि मात्र खाना खाने गरेको किम्वदन्ती छ ।

यो मन्दिरमा दर्शन गरे रोगव्याधिबाट मुक्त भई पारिवारिक सुख–समृद्धि मिल्ने जनविश्वास छ । यसैबीच हनुमानढोका भित्र रहेको नाशल चोकमा रहेको मौलो पुजा गरिएको छ । हनुमानढोकाबाट राजाहरुले राजपाठ चलाउन्जेल नवमीको पूजालाई विशेष रुपमा मनाइने गरिएको इतिहासमा उल्लेख छ ।

अहिले हनुमानढोका दरबार क्षेत्रलाई नेपाली सेनाले सुरक्षा दिदै आएकोले सेनाले नै विशेष पुजा गर्दै आएको छ । आज सेनाले मौलो अगाडी पन्चबली दिएको छ साथै बन्दुक पड्काएर हर्ष बढाई पनि गरेको छ । आज बिहानैदेखि हनुमानढोका दरबारका साथै नेपाली सेनाका ब्यारेक तथा गुल्महरूमा श्रद्धाभक्तिपूर्वक बाजागाजा सहित बलि दिएर जङ्गी निशानपूजा तथा कोतपूजा गरिएको छ ।