काठमाडौं २१ भाद्र । राष्ट्रिय पुनर्निर्माण प्राधिकरणले निजी आवास निर्माणका लागि सरकारबाट पाउने अनुदानको तेस्रो किस्ता चालु आर्थिक वर्षको अन्तिमसम्म लिन सक्ने निर्णय गरेको छ ।

प्रधानमन्त्री केपी ओलीको अध्यक्षतामा बिहीबार सिंहदरबारमा बसेको प्राधिकरण निर्देशक समितिको बैठकले तेस्रो किस्ता चालु आर्थिक वर्षको अन्तिमसम्म लिन सक्ने निर्णय गरेको हो ।

शहरी क्षेत्र, विपन्न वर्ग, बस्ती स्थानान्तरण तथा परम्परागत बस्तीको बाहेकका निजी आवास चालु आर्थिक वर्षभित्र सम्पन्न गर्ने र त्यसका लागि अन्तिम किस्ता रकम असार मसान्तसम्ममा प्राप्त गर्न सक्ने निर्णय भएको प्राधिकरणका प्रमुख कार्यकारी अधिकृत सुशील ज्ञवालीले जानकारी दिनुभयो ।

बैठकले स्थानीय स्तरबाट आउने गुनासो सुन्ने, अनुगमन गर्ने र आवश्यक कारबाहीका लागि प्राधिकरण समक्ष सिफारिस गर्ने अधिकार स्थानीय तहलाई दिने निर्णय गरेको छ ।

यसअघि जिल्लाले सिफारिस गर्ने गरेकोमा अब स्थानीय तहले सिफारिस गर्ने र जिल्लाले अनुगमन गर्ने व्यवस्था मिलाउने निर्णय भएको ज्ञवालीले बताउनुभयो ।

त्यस्तै बैठकले आफ्नै जमिन नभएका भूकम्प पीडितलाई स्थानीय तहको सिफारिसअनुसार बस्ती स्थानान्तरणको सुविधा उपबल्ध गराउने र आवास निर्माण थाल्ने निर्णय पनि गरेको उहाले जानकारी दिनुभयो ।

बैठकले पुनर्निर्माणमा खटिएका सम्पूर्ण कर्मचारीलाई प्राधिकरण मातहत ल्याउने निर्णय पनि गरेको छ । ज्ञवालीले पुनर्निर्माणको मध्यावधी मूल्यांकन जारी रहेको र आगामी दिनमा वित्त योजना बनाएर काम अगाडि बढाइने बताउनुभयो ।