चितवन, १ साउन । चितवनको पवित्र तीर्थस्थले देवघाटधाममा साउने संक्रान्ति मेला सुरु भएको छ ।
नेपालकै पवित्र तीर्थस्थल समेत रहेको देवघाटधाममा साउनको पहिलो दिन साउने संक्रान्तिमा स्नान गर्ने भक्तजनको यहाँ भीड लाग्ने गर्दछ । हिन्दू संस्कारअनुसार साउन महिनालाई वर्षकै सबैभन्दा धार्मिक महिनाका रूपमा लिने गरिएकाले यो महिनाभर श्रद्धालुले विभिन्न पूजा आराधना गरेर विशेष रूपमा मनाउँछन् ।
आज बिहानैदेखि भक्तजन आएर स्नान गर्ने, पवित्र जल चढाउने र शिवको आराधना गरिरहेको देवघाट क्षेत्र विकास समितिका अध्यक्ष टंकनाथ पौडेलले जानकारी दिए ।

यससगै यहां महिना व्यापी बोल ॐ महोत्सव पनि गरिदै आएको छ । ओम (ॐ) शब्दमा अलौकिक शंक्ति रहेकाले बम शब्दलाई हटाएर बोल ओमको नामबाट महोत्सव गत बर्ष देखि सुरु भएको पौडेले बताए ।
देवघाटधाम संरक्षण प्रतिष्ठान चितवनको आयोजनामा सुरु भएको मेला साउन महिनाभरी सञ्चालन हुनेछ । महोत्सवको आजै दिउसो पर्यटन मन्त्री रवीन्द्र अधिकारीबाट उद्धघाटन गर्ने कार्यक्रम रहेको छ ।

यस साउन महिनामा ४ वटा सोमबार परेकोले मेलाको झनै महत्व रहेको बताइन्छ । कालिगण्डकी र त्रिशुलीको संगम वेणीमा स्नान गर्नाले पुण्य प्राप्त हुनुका साथै चर्म रोगसमेत निदान हुने जनविश्वासका कारण देवघाटधाममा स्नान गर्नेको भीड लाग्ने गरेको हो ।

साउने मेला भर्न देशका विभिन्न भागका साथै भारतबाट समेत भक्तजन आउने गरेका छन् । मेलमा चितवन, नवलपरासी, रुपन्देही, मकवानपुर, लमजुङ्ग, लगायत भारतका लाखौ भक्तजनहरु जल आएका छन् । नदीमा पानीको बहाव बढेकाले कुनै घटना नहोस् भनेर व्यवस्थापनका लागि स्वयंसेवक खटाइएको र डुंगासमेत राखिएको समितिले जनाएको छ । बाटो, खानेपानी, विद्युत् गायतको पनि व्यवस्थापन भइरहेको देवघाट क्षेत्र विकास समितिका पौडेलले बताए ।
चितवन नवलपरासी र तनहुँको संगममा रहेको देवघाटको सुरक्षाका लागि तीनै क्षेत्रका स्थानीय प्रशासनसँगको समन्वयमा सुरक्षा व्यवस्था मिलाइएको पौडेलले जानकरी दिए ।