चितवन, १८ जेठ । पूर्वी चितवनको कालिका नगरपालिका ६ का किसानहरुको केरा काटेको आरोपमा ५ जना जेल चलान भएका छन् ।

बैशाख १७ गते राती १२ जना किसानहरुको केराको विरुवा काटेको आरोपमा पक्राउ परेका ५ जना नै कारागार चलान भएका हुन् ।

केरा काटेको आरोपमा प्रहरीले कालिका नगरपालिका वडा नम्बर ६ का अर्जुन गहतराज , कालिका १ का मनिष बहादुर गुरुङ्ग , कालिका ३ का सुजन लोपचन , कालिका ३ कै गोपाल परियार र कालिका ५ का उमेश माझीलाई प्रहरीले पक्राउ गरेको थियो ।

उनीहरुलाई सार्वजनिक कसुर तथा सजाय ऐन अन्तर्गतको मुद्धा दर्ता गरि अनुसन्धान गरेको र फैसलाको लागी जिल्ला प्रशासन कार्यालय चितवनमा पठाइएकोमा जनही २ लाख २५ हजार धरौटी माग भएको इलाका प्रहरी कार्यालय टाडीका प्रहरी निरिक्षक दयाकृष्ण भट्टले जानकारी दिनुभयो ।

माग गरेको धरौटी रकम बुझाउन नसक्दा मंगलबार ५ जना नै जिल्ला करागार भरतपुर चलान भएका हुन् । केरा फडानी हुँदा १५ लाख ४७ हजार रुपैयाँ बराबरको क्षती भएको किसानहरुले दावी गरेका छन ।