पोखरा, २४ वैशाख । नेकपा माओवादी केन्द्र अध्यक्ष पुष्पकमल दाहाल प्रचण्डको जन्मस्थान कास्की हो । जन्मेको केही बर्षमै बाबुसंगै कास्कीबाट चितवनको शिवनगर झरेका प्रचण्डलाई अहिले जन्मथलोको याद अलि बढी नै हुन थालेको छ । प्रचण्डले आफु जन्मेको ठाउंमा पुनः घरघडेरी जोड्न चाहेका छन् ।

जन्मस्थानको मायाले हो वा अन्य कुनै कारणले, प्रचण्डको कास्की लगाव अहिले अलि बढ्न थालेका छ । कतिपय सन्दर्भमा जीवनको उत्तरार्धमा जन्मेकै ठाउँमा दिन बिताउने चाहना व्यक्त गर्ने गरेका प्रचण्डले आफ्नो जन्मस्थान कास्कीको अन्नपूर्ण गाउपालिका १ मा रहेको लेवाडेमा घर बनाउने र पोखरा आएको बखतमा त्यही घरमा बास बस्ने बताउनथालेका छन् । यही उद्देश्यका लागि प्रचण्डले लेवाडेमा आफ्ना बाबु मुक्तिराम दाहालले बेचविखन गरेको जग्गा पुनः किन्न चाहेका छन् । कास्की छाडेर चितवन बसाई सरेका प्रचण्डले जीवनको उत्तरार्धमा आफ्ना दाजुभाइसंग जीन्दगी विताउने बाचा समेत गरेका छन् ।

जग्गा खोज्न लेवाडे पुगेका उनले आफ्नो योजना अनुरुप नै जन्मस्थानमा घर बनाउने र पोखरा तथा आसपास आउदा लेवाडेमा बनाउने घरमानै बास बस्ने बताएका छन् । आफ्ना खलक तथा लेवाडेबासीसँग प्रचण्डले कास्कीको हेम्जा पुग्ने बित्तिकै बचपनको याद आउने, बचपनमा घट्टेखोलामा बाख्रा गाइ चराउने र सांझपख घर पर्कदा निगालोको सिठा टाउकोमा बोकेर उकालो लागेको सम्झना आउने स्मरण गरे । पुरानो यादलाई स्मरण गराउनकै लागी पनि जन्मस्थानमा घर बनाउने उनको विचार रहेछ । प्रचण्डले आफु प्रधानमन्त्री हुँदा र सरकारमा रहंदा पनि जन्मस्थानको लागि केही गर्न नसकेको भन्दै माफी समेत मागे ।

प्रचण्डको यो निर्णयले आफ्नो गाउपालिकाले मुहार फेर्नेमा आफु ढुक्क रहेको अन्नपूर्ण गाउपालिकाका अध्यक्ष युवराज कुंवर बताउंछन् । पहिले पहिले पनि प्रचण्डलाई आफ्नो जन्मस्थानमा बिकासका कार्यक्रमसंगै जनतासंग प्रत्यक्ष सरोकार राख्ने खानेपानी, सिचाइ, बिद्युत लगायतका क्षेत्रमा सहयोग गर्न आग्रह गरेको वताउदै कुंवरले प्रचण्ड स्वयं आफै जन्मभुमिमा आएर घर बनाउने भएपछि सिंगो अन्नपूर्ण गाउपालिकामा खुसीयाली छाएको बताए ।

त्यसो त माओवादी अध्यक्ष प्रचण्डले पार्टीको निर्णय अनुसारनै आफ्नो जन्मस्थानमा घर बनाउने तयारीमा रहेको कास्कीका माओवादी नेता तथा प्रदेश सांसद दिपक कोइरालाले वताए । प्रचण्डको मात्र नभइ नेपालको युगान्तकारी क्रान्तिका नायकको घर हुने भएकाले पनि पर्यटनमा समेत थप टेवा पुग्ने उनले विश्वास गरे ।

अध्यक्ष प्रचण्ड आफ्नो निर्वाचन क्षेत्र चितवनमा बारम्बार पुग्ने गर्छन् । चितवनसंगसंगै अब जन्मस्थान कास्कीमा पनि उनी जान चाहन्छन् । घरबारबिहीन जस्तै अवस्थामा रहेका प्रचण्डले जीवनको उत्तरार्धमा कमसेकम ओत लाग्ने घर खोज्नुलाई सकारात्मक रुपमै लिन सकिन्छ ।