काठमाडौं, ८ वैशाख । विवेकशील साझा पार्टीले माइतीघर मण्डलामा विरोध प्रदर्शन गर्न रोक लगाएको भन्दै विरोध प्रर्दशन गरेको छ ।

जिल्ला प्रशासन कार्यालय काठमाडौंले विरोध प्रदर्शन गर्न पाइने सात स्थानमात्र तोकेपछि विवेकशील साझा पार्टीले यसले लोकतन्त्रप्रति सरकारको प्रतिवद्धतामा नै गम्भीर प्रश्न उठाएको भन्दै विरोध प्रर्दशन गरेका हुन् ।

प्रशासन कार्यालयले बैंशाख १६ गतेदेखि लागूहुने गरि रत्नपार्क, माइतीघरमा समेत विरोध प्रदर्शन गर्न रोक लगाएको छ । शान्तिपूर्णरुपमा गरिने जनप्रदर्शन कार्यक्रमलाई कमजोर पार्ने गरी लगभग पुरै शहरलाई ‘निषेधित क्षेत्र’ बनाएको आरोप विरोधमा सहभागीहरुको छ ।

विरोध कार्यक्रममा शिक्षण अस्पतालका चिकित्सक डाक्टर गोविन्द केसीले संविधानको धारा १७ ले व्यवस्था गरेको स्वतन्त्रताको हकको बिरुद्ध हुनेगरी आएको यो निर्णय लोकतन्त्रको मर्म विपरीत रहेको आरोप लगाउनुभयो ।

सरकारलाई जिम्मेवार र जवाफदेही बनाउने माध्यमका रूपमा शालीन एवं भद्र विरोधलाई अपनाउनेहरुलाई चिन्तित तुल्याएको भन्दै आफुहरुको विरोध रहेको उहाको भनाई छ ।

विवेकशील साझा पार्टीले भद्र आन्दोलनको प्रतीक बनेको माइतीघर मण्डलालाई निषेधित क्षेत्र बनाउने निर्णय फिर्ता लिन सरकारसँग माग गरेको छ ।