चितवन, २८ चैत । चितवनमा पछिल्लो समयमा भएका हिंसात्मक घटनाहरुले सुरक्षा जोखिम बढाएको सुरक्षा समितिले निकर्ष निकालेको छ ।
नारायणगढ बजारको मुख्य बजार शहीदचोकमा भरतपुर महानगरपालिकाका १० का वडाध्यक्ष अरुणपीडित भण्डारी र भरतपुर २ क्षेत्रपुरमा कालिका कन्सट्रक्सनमा बम बिस्फोटका घटना भएसँगै यहाँको जनजीवन त्रसित बनेको छ ।

जिल्ला सुरक्षा समितिको बुधबार जिल्ला प्रशासन कार्यालयमा बसेको बैठकले सुरक्षा चुनौती बढेको निश्कर्ष निकाल्दै आपराधिक क्रियाकलापलाई निस्तेज बनाएर जाने निर्णय गरेको प्रमुख जिल्ला अधिकारी नारायणप्रसाद भट्टले जानकारी दिए ।

मंगलबार भएका दुवै घटनामा नेत्रविक्रम चन्द बिप्लव नेतृत्वको नेकपाको हात रहेको दावी प्रहरीको छ ।
जिल्लाका सबैजसो स्थानीय तहका प्रमुख, उपप्रमुख र वडाध्यक्षहरुलाई राजीनामा दिन नेकपाले पत्र काटेको छ ।
जिल्ला प्रहरी कार्यालय चितवनले नेकपाका कार्यकर्तालाई निगरानीमा राखेको बताएको छ । नेकपाको नाममा जिल्लामा विभिन्न आपराधिक क्रियाकलापहरु बढ्न थालेपछि सो पार्टीका नेता र कार्यकर्तालाई निगरानी राखेको प्रहरीले जानकारी दिएको छ ।
मंगलबारका दुई घटनापछि चितवन प्रहरीले नेकपाको जनपरिचालन समिति सदस्य दिवस भुसाल सहित अन्य ४ जनालाई पक्राउ समेत गरेको छ ।
पक्राउ पर्नेमध्ये एक जना बम विस्फोटमा संलग्न भएको र अन्य ४ जना वडाध्यक्ष भण्डारीमाथि आक्रमणमा संलग्न रहेको प्रहरीको दावी  छ । जिल्लामा नेपाल प्रहरी ,शशस्त्र प्रहरी र राष्ट्रिय अनुसन्धानको टोलीलाई बिशेष सक्रिय बनाएर काम गरिरहेको थापाको दावी छ ।