जुफाल (डोल्पा) २७ चैत्र । हिमाली जिल्ला डोल्पामा खेलकुद मैदान नहुदा जुफालमा रहेको विमानस्थलको धावनमार्गलाई मैदानको रुपमा प्रयोग गरिएको    छ ।
चैत २५ गतेबाट ठुलीभेरी नगरपालिका अन्तरगतको आदर्श माद्यमिक बिद्यालयमा शुरु भएको १० औ जिल्लास्तरीय राष्ट्रपति रनिङ्गशिल्ड प्रतियोगिताको लागि खेलकुद मैदानको अभावमा  धावनमार्गलाई जिल्ला खेलकुद समिति र आयोजक बिद्यालयको अनुरोधमा खेलकुद प्रतियोगिताहरुको खेलहरु खेलाइएको हो ।

हरेक दिन बिहान सात बजे देखि हवाई उडानले ब्यस्त हुने र टिकटको लागि यात्रुहरु बीच हानथाप हुने गरेको  बिमानस्थल भने सोमबार दुलही सिँगारिए झै रंगीचंगी पोसाक लगाइएका बिद्यार्थीहरु,दर्शक र समर्थकहरुको उपस्थितीले बिमानस्थल रंगिएको थियो ।
आयोजक बिद्यालय आदर्श माबिमा धावकको लागि मैदान नपुगेपछि १०० मिटर २०० मिटर र ४०० सय मिटर साथै रिले दौडका भागलिएका छात्र तथा छात्राहरुको दौडको लागि बिमानस्थलको धावनमार्गलाई प्रयोग गरिएको हो ।

३०० मिटर ८०० मिटर र १५०० मिटरको दौड प्रतियोगिता भने बिद्यालयकै खेलमैदानमा संञ्चालन गरिएको थियो ।
नेपाल नागरिक उडड्यान प्राधिकरण जुफालका निमित्त प्रमुख भरत जोशीले कानूनत बिमानस्थलमा कुनै पनि कार्यक्रम गर्न नमिल्ने भएपनि हिमाली पिछडिएको र खेलकुद मैदानको अभावमा हवाई उडान नभएको समयमा दिउसो १२ बजे पछि आयोजकले अनुरोध गरेकाले कुनै पनि किसिमको धावनमार्गमा क्षेती नपुर्याउने सर्तमा खेल संचालन गर्न दिएको बताउनुभयो ।

जुफाल बिमानस्थलका सुरक्षा इन्चार्ज प्रहरी निरिक्षक कृष्णप्रसाद पौडेलले बिमानस्थलको सुरक्षा गर्ने जिम्मेवारी आफ्नै भएपनि नागरिक उडड्यान कार्यालयको निर्देशनमा शान्तिपुर्ण रुपमा कार्यक्रम गर्न दिएको बताए ।

आयोजक बिद्यालय प्रधानाध्यापक पुर्णबहादुर डाँगीले र खेलकुद समितिका अध्यक्ष लंकबहादुर रोकायले बिद्यालयमा भएको खेलकुद मैदानले दौडको लागि ठाउँ नपुगेकाले एक दिन तीन घण्टा लागि मात्र नागरिक उड्डायनको अनुमतिमा संचालन गरिएको बताउनुभयो ।

चैत २७ गते सम्पन्न गर्ने गरि शुरु भएको यो वर्षको १० औ राष्ट्रपति रनिँङ्गशिल्ड प्रतियोगिता खेल संचालनको क्रममा भलिबल ट्रिपलजम्प र ३०० मिटर दौड संचालनमा बिवादका कारण केही समय सम्म खेल अगाडि बढ्न सकेको थिएन् । यो वर्षको रनिँङ्गशिल्ड प्रतियोतिामा जिल्लाका ११ ओटा माध्यामिक बिद्यालयले सहभागिता जनाएका छन ।