काठमाडौं, ३ असार । शान्ति र लोकतन्त्रका लागि पेसागत सञ्जाल (पापड) ले पछिल्लो समय विकसित राजनीतिक, संवैधानिक तथा प्रशासनिक गतिविधिप्रति चिन्ता व्यक्त गरेको छ ।

बुधबार पापडमा आबद्ध अध्यक्षहरूले संयुक्त प्रेस विज्ञप्ति जारी गर्दै यस्तो चिन्ता व्यक्त गरेका हुन् । पापडले संविधानको कार्यान्वयन, लोकतान्त्रिक संस्थाहरूको सुदृढीकरण, विधिको शासन तथा नागरिक अधिकारको संरक्षण राज्य सञ्चालनका आधारभूत मान्यता रहेको विज्ञप्तिमा जनाएको छ ।

तर, वर्तमान शासन सञ्चालनको शैलीले ती मूल्य मान्यताहरूलाई क्रमशः संस्थागत रूपमै कमजोर बनाउदै लैजान खोज्नु चिन्ताको विषय हो, पापडको विज्ञप्तिमा उल्लेख छ । पापडले राज्यका अंगहरूलाई लोकतन्त्रका न्यूनतम मूल्य मान्यताबारे स्मरण गराएको छ ।

साथै, पापडले लोकतन्त्र, संविधान र नागरिक अधिकारको संरक्षणका लागि सबै लोकतन्त्रवादी शक्ति, पेसागत संगठन, सञ्चारक्षेत्र, शैक्षिक समुदाय तथा नागरिक समाजलाई एकजुट भई लोकतान्त्रिक मूल्यमान्यताको पक्षमा उभिन समेत आह्वान गरेको छ ।

पापडको विज्ञप्तिमा नेपाल बार एसोसिएसनका अध्यक्ष वरिष्ठ अधिवक्ता प्रा।डा। विजयप्रसाद मिश्र, नेपाल प्राध्यापक संघका अध्यक्ष प्रा.डा. रमेशकुमार जोशी, नेपाल चिकित्सक संघका अध्यक्ष डा। बद्री रिजाल, नेपाल पत्रकार महासंघकी अध्यक्ष निर्मला शर्मा, नेपाल शिक्षक महासंघका अध्यक्ष लक्ष्मीकिशोर सुवेदी र नेपाल इन्जिनियर्स एसोसिएसनका अध्यक्ष सुवासचन्द्र बरालले हस्तक्षर गरेका छन् ।

पापडले लोकतन्त्र केवल निर्वाचनमार्फत प्राप्त बहुमतको शासनमात्र नभई संविधानको सर्वोच्चता, शक्तिको सन्तुलित प्रयोग, संस्थागत उत्तरदायित्व, अभिव्यक्ति स्वतन्त्रता, सूचनाको हक, पारदर्शिता, नागरिक स्वतन्त्रता तथा विधिको शासनमा आधारित प्रणाली हो भन्ने न्यूनतम सर्तलाई नबिर्सन भनेको छ ।

सुकुम्वासी बस्ती जबर्जस्ती हटाउने, न्यायपालिकाको स्वतन्त्रता र निष्पक्षतामै आँच आउने गरी कार्यपालिकाबाट निर्देशित न्यायापालिका सञ्चालन गर्ने चाहना, संसद्को सक्रिय र प्रभावकारी भूमिका खुम्च्याउन जवाफदेहीताबाट भाग्ने अभ्यास, नागरिक अधिकार संकुचित पार्ने, प्रेस तथा अभिव्यक्ति स्वतन्त्रता, सूचनाको हकमा आघात पार्ने गरी सञ्चारमाध्यममाथि आर्थिक नाकाबन्दी लगाउनेजस्ता कदमप्रति विरोधसमेत विरोध जनाइएको छ ।

विज्ञप्तिमा संविधानप्रदत्त पेसागत तथा ट्रेड युनियनलगायत अधिकारमुखी संघ–संस्थामाथि राज्यको नियन्त्रणमुखी व्यवहार रहेको भन्दै सरकारलाई खबरदारी गरिएको छ । नागरिक अधिकार खुम्च्याउने तथा प्रेस तथा अभिव्यक्ति स्वतन्त्रता र सूचनाको हकमा अंकुश लगाउने सरकारी प्रयासको विरोधमा नेपाल पत्रकार महासंघले असार ५ गते दिउँसो ४ बजे माइतीघरमा आह्वान गरेको र्‍यालीप्रति पनि पापडले ऐक्यबद्धता जनाउन आह्वान समेत गरेको छ ।