काठमाडौं ३१ जेष्ठ । परराष्ट्रमन्त्री शिशिर खनाल आज चारदिने भ्रमणका लागि चीन प्रस्थान गर्दै हुनुहुन्छ । भारत भ्रमण सकेको केही सातामै हुन लागेको यो भ्रमणलाई कूटनीतिक रूपमा महत्त्वपूर्ण मानिए पनि नेपालका राष्ट्रिय हितसँग जोडिएका संवेदनशील विषयमा सरकारको स्पष्ट एजेन्डा सार्वजनिक नभएकाले प्रश्न उठ्न थालेका छन् ।

बेइजिङमा हुने द्विपक्षीय वार्तामा नेपाल–चीन सम्बन्ध, लगानी, व्यापार र सहकार्यका विषयमा छलफल हुने बताइएको छ । तर, नेपाली भूमि पर्ने लिपुलेक हुँदै भारत र चीनले सञ्चालनमा ल्याएको व्यापारिक मार्गबारे नेपालले कति दृढ रूपमा आफ्नो धारणा राख्छ भन्ने विषयलाई चासोका साथ हेरिएको छ ।

नेपालले आफ्नो नक्सामा समेटेको लिपुलेक, लिम्पियाधुरा र कालापानी क्षेत्रको विषय लामो समयदेखि राष्ट्रिय सरोकारको मुद्दा रहँदै आएको छ । तर, दुई छिमेकी देशबीच नेपाली भूमि समेटिएको क्षेत्रमा हुने सहमति र गतिविधिबारे नेपालले प्रभावकारी कूटनीतिक पहल गर्न नसकेको आलोचना हुँदै आएको छ ।

विश्लेषकहरूका अनुसार भ्रमण केवल औपचारिक भेटघाट, लगानी सम्मेलन र शिष्टाचारमा सीमित भएमा त्यसले नेपालका राष्ट्रिय हितका संवेदनशील मुद्दा ओझेलमा परेको सन्देश दिन सक्छ । चीनसँगको वार्तामा सीमासम्बन्धी चासो, व्यापारिक असन्तुलन र पूर्वाधार परियोजनाको कार्यान्वयनबारे स्पष्ट धारणा राख्न सरकारमाथि दबाब रहेको छ ।

परराष्ट्र मन्त्रालयले भ्रमणलाई सम्बन्ध सुदृढीकरणको अवसर भनेको छ । तर, भ्रमणको वास्तविक सफलता नेपालले आफ्ना राष्ट्रिय हितका विषय कति प्रभावकारी रूपमा उठाउन सक्छ भन्ने आधारमा मूल्याङ्कन हुने देखिन्छ ।