काठमाडौं, १४ वैशाख । देशका मध्य र पूर्वी क्षेत्रका धेरै ठाउँमा हिजो दिउँसो र राति पानी परेको छ । वर्षाका कारण गर्मी केही कम भएको छ । प्रदूषण पनि घटेपछि केही राहत पुगेको छ ।

तर पश्चिमका धेरै ठाउँमा भने वर्षा नभएकाले चर्को गर्मी कायमै छ ।लुम्बिनी र सुदूरपश्चिम प्रदेशका तराईका ठाउँमा आज पनि तातो दिन हुने सम्भावना रहेको मौसम पूर्वानुमान महाशाखाले जनाएको छ । भोलि भने देशका अरु ठाउँमा जस्तै पश्चिममा पनि पानी पर्ने सम्भावना छ ।

पानी परेपछि भोलि पश्चिम तराईमा पनि गर्मी कम हुने महाशाखाको पूर्वानुमान छ ।आज कोशी, बागमती र गण्डकी प्रदेशको हिमाली र पहाडी भूभागका थोरै ठाउँहरुमा तथा लुम्बिनी प्रदेशको पहाडी र हिमाली भूभाग लगायत कर्णाली र सुदूरपश्चिम प्रदेशको हिमाली भूभागका एक–दुई ठाउँमा मेघगर्जन र चट्याङसहित मध्यम वर्षा र हिमपातको सम्भावना छ ।भोलि सबै प्रदेशका धेरै ठाउँमा मेघगर्जन र चट्याङसहित मध्यमसम्मको वर्षा र हिमपातको सम्भावना रहेको महाशाखाले जनाएको छ । हिजो गण्डकी प्रदेशको केही ठाउँहरुमा, बागमती र लुम्बिनी प्रदेशको थोरै ठाउँहरुमा तथा कोशी र मधेश प्रदेशको एक–दुई ठाउँमा मेघगर्जन र चट्याङसहित मध्यमसम्मको वर्षा र हिमपात भएको थियो । केही ठाउँमा हावाहुरीसमेत चलेको थियो ।यो हप्ताभरी बदली र वर्षा हुने महाशाखाले जनाएको छ । महाशाखाका अनुसार अहिले नेपालमा पश्चिमी र स्थानीय वायुको साथै पूर्वी भाग नजिक तल्लो वायुमण्डलमा रहेको न्यूनचापीय क्षेत्रको आंशिक प्रभाव रहेको छ ।