काठमाडौं । प्रधानमन्त्री बालेन्द्र शाहले आज संसदमा रहेका सबै दलका समानुपातिक सांसदहरूसँग सामूहिक छलफल गरेका छन् ।

यसअघि उनले प्रत्यक्ष निर्वाचित सांसदहरूसँग प्रदेशगत रूपमा छुट्टाछुट्टै छलफल गरेका थिए भने समानुपातिक सांसदहरूलाई एकैपटक बोलाइएको हो।

सिंहदरबारस्थित प्रधानमन्त्री कार्यालयमा दिउँसो १२ बजे सुरु भएको बैठक करिब ५ घण्टा चलेको थियो। ११० जना समानुपातिक सांसदहरूमध्ये अधिकांशको उपस्थिति रहेको थियो। प्रत्येक सांसदलाई बोल्नका लागि १ मिनेट समय दिइएको थियो।

छलफलका क्रममा सांसदहरूले उठाएका विषयहरू प्रधानमन्त्रीको सचिवालयका सदस्यहरूले टिपोट गरेका थिए। साथै, सांसदहरूले ल्याएका लिखित सुझावहरू दर्ता गर्ने व्यवस्था पनि गरिएको थियो।

केही प्रतिपक्षी सांसदहरूले भने प्रत्यक्ष निर्वाचित सांसदहरूसँगै समानुपातिक सांसदहरूलाई पनि एउटै सत्रमा बोलाइएको भए अझ प्रभावकारी हुने धारणा व्यक्त गरेका थिए। उनीहरूका अनुसार, प्रत्यक्ष सांसदहरूले के-के विषय उठाए भन्ने जानकारी पाउन नपाएको गुनासो थियो।

त्यस्तै, केही प्रतिपक्षी सांसदहरूले सरकारको १०० बुँदे कार्ययोजना र राष्ट्रिय प्रतिबद्धतापत्रमा भारतसँगको सीमा समस्यालाई समावेश नगरिएको विषयमा प्रश्न उठाएका थिए। सरकारका योजनाहरू कार्यान्वयन गर्न आवश्यक आर्थिक स्रोतको सुनिश्चितता कसरी गरिने भन्ने विषय पनि उनीहरूको चासोमा परेको थियो। मधेस, कर्णाली र सुदूरपश्चिम क्षेत्रका सांसदहरूले आफ्ना क्षेत्रीय मुद्दाहरू प्रस्तुत गरेका थिए।

सांसदहरूको कुरा करिब ५ घण्टा सुनेपछि प्रधानमन्त्रीले करिब ५ मिनेट मात्र प्रतिक्रिया दिएका थिए। उनले समानुपातिक सांसदहरूलाई आफूलाई कमजोर नठान्न आग्रह गर्दै, प्रतिनिधित्वका हिसाबले उनीहरूको भूमिका महत्वपूर्ण रहेको बताएका थिए। साथै, आफूले झापा–५ मा विशेष योगदान नदिएर पनि चुनाव जितेको उदाहरण दिँदै एउटै क्षेत्रसँग मात्र जोडिनुपर्ने बाध्यता नभएको उल्लेख गरेका थिए।

प्रधानमन्त्रीले सांसदहरूले उठाएका माग र सुझावहरूलाई सम्भव भएसम्म सम्बोधन गर्ने आश्वासन पनि दिएका छन्।