काठमाडौं, २९ चैत्र । परराष्ट्रमन्त्री शिशिर खनालको सम्पत्ति विवरण सार्वजनिक भएको छ । उक्त विवरण अनुसार मन्त्री खनालसँग विभिन्न कम्पनीमा लगानीदेखि सुनसम्म रहेको उल्लेख छ ।

परराष्ट्रमन्त्री खनालको काठमाडौंको टोखा नगरपालिका–१० मा ६ आनामा बनेको घर रहेको छ ।

६ आना जग्गामा बनेको उक्त घर जुन २०५८ सालमा ३ लाख रुपैयाँमा खरिद गरिएको हो । उक्त घर सुर्यभक्त खनालको नाममा रहेको उल्लेखे छ ।

त्यस्तै, सुर्यभक्त खनालकै नाममा तनहुँमा १५ रोपनी पैतृक जग्गा, पूर्व नवलपुरको देवचुलीमा १३ रोपनी र नेपालगञ्जमा २ कठ्ठा जग्गा रहेको विवरणमा उल्लेख छ । यसका साथै खनालसँग २२ तोला सुन, २५ तोला चाँदी र १० लाख रुपैयाँ नगद रहेको उल्लेख छ ।

परराष्ट्रमन्त्री खनालको पाँच बैंकमा नगद रहेको छ । जसमा एमएमबि बैंकमा ३ लाख २० हजार रुपैयाँ, नबिल बैंकमा २ लाख १ हजार रुपैयाँ, राष्ट्रिय वाणिज्य बैंकमा २ लाख ६८ हजार रुपैयाँ, एनआईसी एशिया बैंकमा ४ लाख ५१ हजार रुपैयाँ र ग्लोबल आइएमई बैंकमा १७ हजार रुपैयाँ रहेको छ ।

त्यस्तै, अच्युता अधिकारीको नाममा एभरेष्ट बैंकमा ४३ हजार रुपैयाँ र नबिल बैंकमा ४ हजार रुपैयाँ रहेको उल्लेख गरिएको छ । उनकै नाममा एक दर्जन कम्पनीमा शेयर लगानी रहेको उल्लेख छ ।

खनालको विभिन्न कम्पनीमा स्वामित्व रहेको पाइएको छ । जसमा पिक एण्ड ड्रप नेपालमा ३३ प्रतिशत, रिग्पा इन्टेल प्रालिमा १०० प्रतिशत, ताजा एग्रो फार्ममा १६ प्रतिशत स्वामित्व रहेको छ ।

साथै बीपीडब्ल्यु माइक्रोफाइनान्समा २ हजार ५६० कित्ता र ओम मेगाश्री फर्मास्युटिकल्समा ५ हजार कित्ता शेयर रहेको विवरणमा उल्लेख छ ।