काठमाडौं, चैत २६ — पूर्वप्रधानमन्त्री तथा नेकपा (एमाले) का अध्यक्ष केपी शर्मा ओली १३ दिनपछि प्रहरी नियन्त्रणबाट रिहा हुनुभएको छ। जिल्ला प्रहरी परिसर काठमाडौंले उहाँलाई त्रिभुवन विश्वविद्यालय शिक्षण अस्पतालमै आफन्तको जिम्मा लगाइएको जनाएको छ।

जिल्ला प्रहरी परिसर काठमाडौंका एसपी पवनकुमार भट्टराईका अनुसार उहाँको स्वास्थ्य अवस्थालाई ध्यानमा राख्दै अस्पतालमै परिवारको जिम्मा लगाउने निर्णय गरिएको हो। अबको थप निर्णय चिकित्सकको सल्लाह र स्वास्थ्य अवस्थाको मूल्यांकनपछि हुने प्रहरीले जनाएको छ।

जेनजी आन्दोलनमा दमन गर्न आदेश दिएको आरोपमा प्रहरीले उहाँलाई चैत १४ गते गुण्डुस्थित निवासबाट पक्राउ गरेको थियो। पक्राउपछि स्वास्थ्यमा जटिलता देखिएसँगै उहाँ त्रिवि शिक्षण अस्पतालमा उपचाररत रहनुभएको थियो।

यसैबीच, उहाँकी पत्नी राधिका शाक्य ले गैरकानूनी रूपमा हिरासतमा राखिएको दाबी गर्दै सर्वोच्च अदालतमा बन्दीप्रत्यक्षीकरणको निवेदन दर्ता गर्नुभएको थियो।

सो निवेदनमाथि सुनुवाइ गर्दै सर्वोच्च अदालतले चैत २३ गते बेलुका पूर्वप्रधानमन्त्री ओली र तत्कालीन गृहमन्त्री रमेश लेखक माथिको अनुसन्धान चैत २६ गते बिहीबारभित्र टुंग्याउन आदेश दिएको थियो।

अदालतले तोकिएको समयसीमाभित्र अनुसन्धान पूरा हुन नसके शर्तसहित रिहा गर्नसमेत आदेश दिएको थियो। सोही आदेशअनुसार बिहीबार उहाँलाई रिहा गरिएको प्रहरी स्रोतले जनाएको छ।

ओलीको रिहाइसँगै राजनीतिक वृत्तमा यस घटनाले नयाँ बहस सिर्जना गरेको छ।