काठमाडौं। ‘राष्ट्रिय स्वतन्त्र पार्टी (रास्वपा) भित्रको एकता र समन्वयबारे प्रश्न उठेको छ । पार्टी सभापति रवि लामिछाने झापा क्षेत्र नम्बर ५ (दमक) मा चुनावी सभामा पुग्दा सोही क्षेत्रका उम्मेदवार तथा पार्टीका वरिष्ठ नेता बालेन्द्र शाह (बालेन) भने अनुपस्थित रहे । बालेन हिजैदेखि सुनसरीको इटहरी पुगिसकेका थिए ।

रास्वपाले झापा–५ मा ‘वरिष्ठ नेताको क्षेत्रमा सभापतिको सम्बोधन’ भनेर विशेष कार्यक्रम आयोजना गरेको थियो । तर, बालेन दमकको सभामा देखिएनन् । यो घटनाले पार्टीभित्र आन्तरिक असन्तुलन वा समन्वय अभावको चर्चा चुलिएको छ ।

रवि लामिछाने मंगलबार बिहान चन्द्रगढी विमानस्थलमा उत्रिएपछि बिर्तामोड, दमक लगायतका क्षेत्रमा जनसम्पर्क तथा चुनावी सभामा व्यस्त रहे । विमानस्थलबाटै उनको कार्यतालिका सार्वजनिक थियो, जसमा दमकको कार्यक्रममा वरिष्ठ नेता बालेनसँगै सम्बोधन गर्ने उल्लेख थियो । तर, बालेन हिजै इटहरी पुगिसकेका थिए र दमक आएनन् ।

झापा–५ क्षेत्रीय समितिलाई बालेनको इटहरी जाने जानकारी थिएन । बिहानसम्म दुवै नेताले दमकमा सम्बोधन गर्ने बताइँदै आएको थियो । क्षेत्रीय नेताहरूका अनुसार, बालेनको चुनावी कार्यक्रम पार्टी केन्द्र वा क्षेत्रीय समितिसँग पूर्व छलफल नहुने गरेको छ ।

रास्वपा झापा–५ का एक नेताले भने, “वरिष्ठ सभापतिको चुनावी कार्यक्रम उहाँको सचिवालयले बनाउँछ । हामीलाई थाहा हुँदैन ।” क्षेत्रीय सभापति भेषराज भट्टराईले पनि स्वीकार गरे, “कार्यतालिका आएपछि सोही अनुसार पार्टी परिचालन हुने गरेको छ ।”

यसबाहेक, झापा–५ मा राखिएका चुनावी पोस्टर तथा प्रचार सामग्रीमा पार्टी सभापति रवि लामिछानेको फोटो प्रयोग भएको छैन । प्रचार सामग्रीमा उम्मेदवार बालेनको मात्र फोटो राखिएको छ । स्थानीय नेताहरूका अनुसार, उम्मेदवारको सचिवालयले उपलब्ध गराएको सामग्री प्रयोग हुने गरेको छ । पार्टी केन्द्रबाट छापिएका प्रचार सामग्रीमा सभापतिको फोटो नहुँदा पनि यो अवस्था आएको हो ।

एक स्थानीय नेताले व्यंग्यात्मक टिप्पणी गरे, “दुई खोलाको पानी मिल्दा त १० किलोमिटर पानी छुट्टिन्छ, पार्टी हो मिलेको भर्खरै हो ।”

यद्यपि, रास्वपाको कोसी प्रदेशस्तरीय चुनावी सभामा भने रवि लामिछाने दमकका कार्यक्रम सकेर इटहरी पुग्ने र बालेनसँगै सम्बोधन गर्ने कार्यक्रम रहेको छ । पार्टीका प्रभावशाली दुई नेताबीचको यो घटनाले निर्वाचन अभियानको अन्तिम चरणमा आन्तरिक समन्वय कति प्रभावकारी छ भन्ने प्रश्न उठाएको छ । झापा–५ मा बालेनलाई एमाले अध्यक्ष केपी शर्मा ओलीसँगको प्रतिस्पर्धा कडा छ, जसमा पार्टी नेतृत्वको एकताबद्ध उपस्थिति महत्वपूर्ण मानिन्छ ।

राजनीतिक विश्लेषकहरूका अनुसार, रास्वपामा रवि र बालेनबीचको सम्बन्ध बाहिरबाट मजबुत देखिए पनि यस्ता घटनाले आन्तरिक असन्तुलनको संकेत दिन सक्छ । फागुन २१ को निर्वाचन नजिकिँदै गर्दा पार्टी एकताको परीक्षा यसैबाट सुरु भएको छ ।