काठमाडौं, ३ वैशाख ।नेपाली कांग्रेसको आधिकारिकता विवाद न्यायाधीशद्वय शारंंगा सुवेदी र नृपध्वज निरौलाको इजलासमा पेसी तोकिएको छ । निवर्तमान सभापति शेरबहादुर देउवाका तर्फबाट दायर भएका दुई निवेदन पहिलो नम्बरमा सुनुवाइका लागि पेसी तोकिएको हो ।

देउवाका तर्फबाट दायर दुई निवेदनमाथि सुनुवाइ हुँदै छन् । २६ चैतमा शेरबहादुर देउवा पक्षले नियमित महाधिवेशनको कार्यसूची रोक्न माग गर्दै पूरक निवेदन दिएको थियो । यसअघि नै दर्ता भएको रिटलाई पनि साथै राखेर हेरिनुपर्ने माग देउवा पक्षको थियो । सर्वोच्चले एकतर्फी रूपमा अन्तरिम आदेश जारी नहुने भन्दै २७ चैतमा दुवै पक्षलाई छलफलमा बोलाएको थियो ।

४ माघ २०८२ मा गगन थापालाई पार्टीको आधिकारिकता दिने निर्णयविरुद्ध रिट दायर भएको थियो । पार्टीको आधिकारिकतासम्बन्धी विवाद नटुंगिदासम्म १५औं महाधिवेशनको नयाँ कार्यतालिका कार्यान्वयन नगर्न पछिल्लो रिटमा माग गरिएको छ ।

सभापति गगन थापा पक्षले महाधिवेशनको तयारी गर्न थालेपछि त्यसलाई रोक्न देउवा पक्षले माग गरेका थिए ।

यसअघिको रिटमा तत्कालीन महामन्त्रीद्वय गगन थापा र विश्वप्रकाश शर्माको अगुवाइमा सभापति देउवाको असहमतिका बीच विशेष महाधिवेशन गरेर अस‌ंवैधानिक रुपमा नेतृत्व चयन गरिएको दाबी गर्दै नयाँ कार्यसमितिलाई मान्यता दिन नहुने र निर्वाचन आयोगको निर्णय बदर हुनुपर्ने माग गरेका थिए । तर, सर्वोच्चले अन्तरिम आदेश जारी गर्न अस्वीकार गर्दै छलफलमा मात्र बोलाएको थियो ।

६ माघमा न्यायाधीश सुनिलकुमार पोखरेलको इजलासले कारण देखाउ आदेश जारी गर्दै अग्राधिकार दिएको थियो । त्यसपछि १ चैतमा तोकिएको पेसी हेर्न नभ्याइने हुँदै स्थगित भयो भने २२ चैतमा अदालतकै तर्फबाट स्थगित गरिएको थियो ।