काठमाडौं, ६ फागुन । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले जनयुद्धको जगमा स्थापित सङ्घीय लोकतान्त्रिक गणतन्त्रलाई संस्थागत गर्दै मुलुकलाई समृद्धिको दिशामा लैजाने जिम्मा अब जनताको हातमा आएको बताएका छन्।बुधबार रुकुम पूर्वको सिस्ने गाउँपालिका-६, ढकालबारामा आयोजित चुनावी सभालाई सम्बोधन गर्दै उनले यस्तो धारणा राखेका हुन्।

प्रचण्डले रुकुम र रोल्पा आफ्नो क्रान्तिको कर्मथलो र लालकिल्ला भएको सुनाए। उनले भने, ‘हजारौं शहीदहरूको बलिदान, बेपत्ता र घाइते योद्धाहरूको त्याग तथा रुकुम-रोल्पाका लाखौं जनताको रगत(पसिनाकै बलमा देशमा ऐतिहासिक राजनीतिक परिवर्तन सम्भव भएको हो।

हिजो म यहाँ बन्दुक बोकेर आएको थिएँ, आज परिवर्तनलाई संस्थागत गर्न मतपत्र बोकेर आएको छु।’रुकुम पूर्वको विकासका लागि आफ्नो विशेष योजना रहेको सुनाउँदै प्रचण्डले आगामी पाँच वर्षभित्र यस क्षेत्रलाई विकासको नमुना बनाउने प्रतिबद्धता व्यक्त गरे।

उनले शहीद मार्गलाई चीनको सीमासम्म जोड्ने र पक्की बनाउने, स्थानीय जडीबुटीको प्रशोधन र व्यवसायीकरण गर्ने तथा युवाहरूका लागि गाउँमै रोजगारी सिर्जना गरी वैदेशिक पलायन रोक्ने ठोस योजना अघि सारे।

‘मलाई रुकुमका जनताले आफ्नै अभिभावकको रूपमा स्वीकार गर्नुभएको छ, यसले मलाई थप ऊर्जा र शक्ति प्रदान गरेको छ,’ उनले सुनाए, ‘पाँच वर्ष मलाई यहाँको प्रतिनिधिको रूपमा काम गर्ने मौका दिनुभयो भने देशभरिका मान्छे विकासको नमुना हेर्न रुकुम पूर्व आउने वातावरण बनाउनेछु।’