काठमाडौं, २१ माघ । चुनाव नजिकिँदै जाँदा प्रगतिशील लोकतान्त्रिक पार्टी (प्रलोपा) गम्भीर संगठनात्मक संकटमा फसेको देखिएको छ । नेतृत्व तहकै नेताहरू पार्टी छाड्दै अन्य दलतिर लागेपछि कार्यकर्ता अन्योल र निष्क्रियतामा पुगेका छन् ।

गत १८ कात्तिकमा तत्कालीन माओवादी केन्द्रका उपमहासचिव जनार्दन शर्मा र सचिव राम कार्कीको नेतृत्वमा ‘प्रगतिशील अभियान’ घोषणा गरिएको थियो । सोही अभियान पछि जनता समाजवादी पार्टी (नयाँ शक्ति) सँग एकता गर्दै प्रगतिशील लोकतान्त्रिक पार्टी गठन गरिएको हो । ७ मंसिरमा पाँच सदस्यीय अध्यक्ष परिषद् बनाएर भव्य रूपमा पार्टी एकता भए पनि त्यो उत्साह लामो समय टिक्न सकेन ।

२१ फागुनमा हुने चुनावका लागि उम्मेदवारी दिने चरणमै पार्टीका प्रमुख दाबेदारहरूले प्रलोपा त्यागेर अन्य दलबाट उम्मेदवार बन्न थालेपछि पार्टी झनै कमजोर बनेको छ । अछाम–१ बाट प्रलोपाका उम्मेदवार दीपक साउद एमाले प्रवेश गरी त्यहीँबाट चुनावी मैदानमा उत्रिएका छन् । सुदूरपश्चिम प्रदेशका केन्द्रीय सदस्यसमेत रहेका साउदलाई पार्टीले टिकट दिएको भए पनि उनले कुनै आन्तरिक छलफल नगरी एमाले प्रवेश गरेको प्रलोपाका केन्द्रीय सदस्य रामबहादुर देवकरले बताए ।

यस्तै, गण्डकी प्रदेशका सह–इन्चार्ज विमल अधिकारीले पार्टीमा असहमतिपत्र बुझाएर तनहुँमा राष्ट्रिय स्वतन्त्र पार्टीका उम्मेदवारको पक्षमा प्रचार गरिरहेका छन् । उनका अनुसार गण्डकीका तनहुँ, पर्वत, लमजुङ, मुस्ताङ र मनाङलगायत जिल्लामा पार्टी नेतृत्व निष्क्रिय बनेको छ ।

माओवादीबाट अलगिँदा देखिएको उत्साह नेताहरूको आन्तरिक द्वन्द्वकै कारण विघटनतर्फ धकेलिएको अधिकारीको दाबी छ । “वामपन्थी पार्टी बनाउने भनियो । तर, जनार्दन, बाबुराम र सुदन किराँतीको आ–आफ्नै चालले पार्टी एक ठाउँमा बस्न सकेन,” उनले भने ।

पर्वतका पार्टी अध्यक्ष रमेश पौडेल नेतृत्वकै कारण कार्यकर्ता मौन बसेको बताउँछन् । “विधि र विधान मिचेर नेताहरूले नै उम्मेदवारी फिर्ता लिएपछि तलका कार्यकर्ताले कसलाई विश्वास गर्ने ?” उनको प्रश्न छ ।

पार्टीभित्र जनार्दन शर्मा, बाबुराम भट्टराई र सुदन किराँती तीन फरक दिशामा उभिएको कार्यकर्ताहरूको गुनासो छ । शर्माले पश्चिम रुकुममा आफू केन्द्रित गठबन्धन गरे पनि अन्य उम्मेदवारप्रति चासो नदिएको आरोप छ । बाबुराम भट्टराईले अन्तिम समयमा उम्मेदवारी फिर्ता लिए भने सुदन किराँती हर्क साम्पाङको अभियानमा सक्रिय देखिएका छन् ।

कोशी प्रदेशमा प्रलोपाले चार उम्मेदवार उठाए पनि जित्ने सम्भावना कम देखिएपछि कांग्रेस, एमाले र नेकपालाई हराउने रणनीतिअन्तर्गत श्रम संस्कृति पार्टीलाई सहयोग गर्ने नीति लिएको छ । पार्टीका नेता–कार्यकर्ता आफ्ना उम्मेदवारभन्दा हर्क साम्पाङ समर्थित उम्मेदवारको पक्षमा सामाजिक सञ्जालमा प्रचार गरिरहेका छन् ।

प्रलोपाका केन्द्रीय सदस्य हेमन्त राईका अनुसार जित्ने सम्भावना कमजोर भएकाले रणनीतिक रूपमा समर्थन गरिएको हो । यता, अध्यक्ष परिषद्का पाँचै जनाले चुनाव लड्न नसक्नु पार्टी स्थापनाकै अवसर गुम्नु भएको केन्द्रीय सदस्य बद्री चुडालको टिप्पणी छ ।

देशभर ९२ क्षेत्रमा उम्मेदवारी दर्ता गराएको प्रलोपाले पछि ६ स्थानमा उम्मेदवारी निष्क्रिय वा फिर्ता गरिसकेको छ । बाबुराम भट्टराईले गोरखा–१ र २ बाट उम्मेदवारी फिर्ता लिँदा कर्णाली, सिन्धुली, नुवाकोट, सल्यान र कालीकोटमा समेत समस्या देखिएको छ ।

विशेष गरी भट्टराईको उम्मेदवारी फिर्तापछि कार्यकर्तामा व्यापक असन्तोष देखिएको छ । “देशको नेतृत्व गर्छु भन्ने नेताले एउटा क्षेत्रको जिम्मा पनि लिन सकेन,” एक नेताले गुनासो गरे ।

यद्यपि, प्रलोपाका नेता अनिल शर्माले पार्टीभित्र गम्भीर मतभेद नरहेको दाबी गरेका छन् । “केही ठाउँमा समन्वय कमी भएको हुन सक्छ । तर, पार्टी यो चुनावबाट स्थापित हुन्छ,” उनले भने ।

वामपन्थी पार्टी बनाउने घोषणासँगै सुरु भएको प्रलोपा नेतृत्वको अस्थिरताले चुनावको मुखमै गम्भीर चुनौती सामना गरिरहेको देखिन्छ ।