काठमाडौं, २३ चैत । सरकारले आगामी बैशाख २ गतेबाट ‘विद्यार्थी भर्ना तथा पाठ्यपुस्तक वितरण अभियान’ संचालन गर्ने भएको छ ।

शिक्षा, विज्ञान तथा प्रविधि मन्त्रालयले शुक्रबार काठमाडौंमा पत्रकार सम्मेलन गरी आगामी बैशाख २ गतेबाट ‘विद्यार्थी भर्ना तथा पाठयपुस्तक वितरण अभियान’ संचालन गर्न लागिएको जानकारी गराएको हो ।

विद्यालय बाहिर रहेका सबै बालबालिकाहरुलाई विद्यालयमा सहज पहुँचको सुनिश्चित गर्न अभियान नै संचालन गर्ने निर्णय लिइएको शिक्षा, विज्ञान तथा प्रविधि मन्त्री गिरिराजमणि पोखरेलले जानकारी दिनु भयो । उहाँले अभियानमा सहभागी हुन संघ, प्रदेश र स्थानीय तहका जनप्रतिनिधिहरु, राष्ट्रसेवक कर्मचारीहरु, सामाजिक अभियन्ता, निजी एवम् गैर सरकारी क्षेत्र, अभिभावक, पेशागत संघसंस्था, शिक्षाप्रेमी, बुद्धिजीविलगायत आम नागरिकलाई आह्वान पनि गर्नु भयो ।

सरकारले अभियानलाई थप प्रभावकारी बनाउन ‘हामी सबैको इच्छा, अनिवार्य निशुल्क आधारभूत शिक्षा’ भन्ने मूल नारा समेत तय गरेको छ । मन्त्री पोखरेलले विद्यालय भर्ना हुने बालबालिकाहरुका लागि आवश्यक पर्ने पाठ्यपुस्तक भर्ना भएकै समयमा उपलब्ध गराउने गरी स्थानीय सरकारमार्फत् सबै विद्यालयहरुमा आवश्यक बजेटको व्यवस्था गरिएको पनि जानकारी दिनुभयो ।

मन्त्री पोखरेलले आफ्ना बालबालिकाहरुलाई समयमै विद्यालय भर्ना गराई नियमित रुपमा विद्यालय पठाउन पनि अभिभावकहरुसँग अनुरोध गर्नु भयो । सरकारले ‘सबैका लागि शिक्षा कार्यक्रम’ अन्तरगत विविध अभियान संचालन गरेपनि अझै पनि ५ देखि ९ वर्ष उमेर समूहका २ दशमलव ८ प्रतिशत बालबालिकाहरु विद्यालय बाहिर नै रहेको सरकारी तथ्यांक छ ।

विद्यालय तहको शैक्षिक तथ्यांक, २०७४ अनुसार सर्लाही, धनुषा, रौतहट, पर्सा, बारा, कपिलबस्तुलगायतका तराईका जिल्लाहरुमा तुलनात्मक रुपमा धेरै बालबालिकाहरु विद्यालय बाहिर रहेको अवस्था छ ।