बुटवल। प्रदेश नं. ५ का मुख्यमन्त्री शंकर पोखरेलसँग आज नेपालका लागि बेलायती राजदूत रिचर्ड मोरिकले मुख्यमन्त्रीको कार्यालयमा भेटवार्ता गर्नुभएको छ ।

त्यस अवसरमा राजदूत मोरिकले मुख्यमन्त्री पोखरेलसँग बेलायत नेपालको नयाँ संरचनाअनुसार बनेको प्रादेशिक सरकारसँग मिलेर काम गर्न इच्छुक रहेको बताउनुभएको भेटपछि मुख्यमन्त्री पोखरेलले बताउनुभयो ।

भेटका अवसरमा मुख्यमन्त्री पोखरेलले प्रदेश सरकारका आफ्ना प्राथमिकता निर्धारण गर्ने र छिट्टै छलफलका लागि राजदूतसँग अनुरोध गर्ने बताउनुभएको थियो ।

राजदूतले प्रदेश ५ मा खासगरी कृषि र वातावरणीय संरक्षणको क्षेत्रमा काम गर्न सक्ने भेटमा आफूलाई जानकारी गराएको समेत मुख्यमन्त्री पोखरेलले बताउनुभयो ।

उहाँले वैदेशिक सहयोग जुटाउन संघीय सरकारसँग पूर्वअनुमति लिनुपर्ने संवैधानिक व्यवस्थाका बारेमा समेत आफूले राजदूतको टोलीलाई स्पष्ट गराउनुका साथै प्रादेशिक योजना आयोगको निर्माणपछि लगानीका विषयमा छलफल गर्न सकिने जानकारी गराएको बताउनुभयो ।