काठमाडौं २५ माघ । सिक्टा नहरको ठेक्का सीमित कम्पनीलाई दिनेगरी चलखेल गरिएको भन्दै निर्माण व्यवसायी महासंघले पनि आपत्ति जनाएको छ।

सिक्टा सिँचाइ आयोजनाको ठेक्काका लागि निर्माण कम्पनीलाई शुक्रबार ९आज० दिउँसो १२ बजेसम्म आवेदन दिन भनिएको छ। बोलपत्रको सिलबन्दी आजै खोलिँदै छ।

तर शर्मा एन्ड कम्पनी र कुमार श्रेष्ठ निर्माण सेवालाई ठेक्का दिने गरी कार्टेलिङ गरिएको दाबी सम्बद्ध व्यवसायीले गरेका छन्।

नेपाल निर्माण व्यवसायी महासंघका अध्यक्ष रवि सिंहले सीमित कम्पनीले मात्रै टेन्डरमा भाग लिन पाउनेगरी आवेदन माग गरिएको बताए।

‘हामीले सार्वजनिक खरिद अनुगमन कार्यालय, सिँचाइ विभागलगायत सबै ठाउँमा हाइड्रोमा काम गरेको अनुभव सिँचाइमा हुनुपर्छ भनी उजुरी दियौँ’, महासंघका अध्यक्ष रवि सिंहले भने,‘आयोजनाले झुलाएर केही दिनअघि मात्रै आंशिक संशोधन गर्‍यो। अहिलेको अवस्थामा ६र७ कम्पनी मात्रै योग्य देखिन्छन्।’

सिँचाइ विभागले हाइड्रो र पुल निर्माणमा ‘हाइड्रोलिक’ अनुभव भएकालाई ठेक्कामा सहभागी हुन दिइरहेको थियो। निर्माण क्षेत्रमा हाइड्रो सबैभन्दा बढी जोखिम मानिन्छ। सिँचाइ विभागले नियतमै सोझै शंका गर्ने ठाउँ रहेको उनी बताउँछन्।

‘हाइड्रो र ब्रिजको हाइड्रोलिक स्ट्रक्चर बनाएको अनुभवलाई नमान्ने हो भने सिँचाइ हाइड्रोलिक स्ट्रक्चर किन मान्ने’, सिंह भन्छन्,‘सिँचाइमा बनाउने हाइड्रोलिक स्ट्रक्चरभन्दा जटिल स्ट्रक्चर हाइड्रोको हुन्छ किनेभने पानी चुहिनै हुँदैन।’

प्रतिस्पर्धा खुम्चाउन सिँचाइ हाइड्रोलिक स्ट्रक्चर बनाएकोले प्रतिस्पर्धा गर्न पाउने भनेको छ। जलविद्युत् आयोजनामा धेरै लामो नहर बनाउनु पर्दैन। विभागले मागको ७५ करोड बराबरको अनुभव प्रतिस्पर्धा गर्न खोजेका धेरैको पुग्दैन।

सार्वजनिक खरिद अनुगमन कर्यालयका एक उच्च अधिकारीले हाइड्रोको अनुभवलाई पनि सिँचाइमा हुनेगरी सच्चाउन निर्देशन दिएकामा आंशिक मात्रै सच्चिएको बताउँछन्।

‘हामीले सिँचाइ विभागलाई पत्र काटेरै हाइड्रोको अनभुव सिँचाइमा पनि हुनेगरी काम गर्न निर्देशन दिएका थियौँ’, ती अधिकारी भन्छन्,‘केही त संशोधन गरेको पनि छ। तर हामीले भनेका सबै विषय सम्बोधन भएका छैनन्। प्रतिस्पर्धा जति हुनुपर्ने हो त्यति नहुने निश्चित देखिन्छ।’

सिँचाइ मन्त्रालय र विभागसँग मिलेमतो गरी २ निर्माण कम्पनीले ठेक्का पाउने निश्चितजस्तै रहेको दाबी उनी गर्छन्।

‘धेरै कम्पनी प्रतिस्पर्धा हुनेगरी मापदण्ड परिवर्तन गर्न माग राख्दा पूरा सम्बोधन भएन,’ अध्यक्ष सिंहले भने, ‘योग्य कम्पनीलाई पैसा दिएर वा अर्को ठेक्का मिलाइदने आश्वासन दिई सेटिङ गरेको देखिन्छ।’

सिँचाइ विभागले टेन्डरको अवधि बढाउने वा प्रस्ताव खोले पनि मिलोमतो देखिएकाले टेन्डर खारेज हुने अवस्था आउने बताए।

पश्चिम नेपालको राप्ती नदीमा रहेको सिक्टा सिँचाइ आयोजना अन्तर्गत डुडुवा शाखा नहर निर्माणका लागि टेन्डर आह्वान भएको हो।

४३ किमि नहर निर्माणका लागि ठेक्का लागेको छ। यसका शाखा २३ किलोमिटर र उपशाखा १०र१० किमिका गरी कूल ४३ किलोमिटरको नहर निर्माण हुनेछ।

यसका लागि दुईवटा प्याकेजमा ठेक्का आह्वान गरिएको छ। नहर निर्माणको लागत अनुमान २ अर्ब ५० करोड रुपैयाँ छ।

यसको निर्माणसँगै हेड रेगुलेटर, क्रस रेगुलेटर, गाउँका पुल निर्माण गर्नुपर्नेछ।