काठमान्डौ, माघ २

 नेपाली कांग्रेसका नेता पूर्णबहादुर खड्काले पार्टी सभापति शेरबहादुर देउवामाथि लक्षित गरी सार्वजनिक रूपमा लगाइएका आरोपहरू असत्य र भ्रामक भएको बताएका छन्।

पार्टी केन्द्रीय कार्यालय सानेपामा आयोजित पत्रकार सम्मेलनमा खड्काले विशेष महाधिवेशनको विषयलाई लिएर पार्टीभित्र गलत व्याख्या र अतिरञ्जना गरिएको दाबी गरे। उनका अनुसार नियमित महाधिवेशनको कार्यतालिका सार्वजनिक भएसँगै विशेष महाधिवेशनको औचित्य सकिएको निष्कर्ष तत्कालीन महामन्त्रीहरू गगनकुमार थापा र विश्वप्रकाश शर्मासहितको बैठकले नै निकालेको थियो।

खड्काले प्रतिनिधिसभा निर्वाचन प्रक्रिया अघि बढिसकेको र राष्ट्रिय सभा निर्वाचनका लागि उम्मेदवारी दर्ता भइसकेको संवेदनशील अवस्थामा पार्टीभित्र अस्थिरता सिर्जना गरिएको बताए। विशेष महाधिवेशनको नाममा अघि सारिएको गतिविधिले पार्टी विखण्डनको जोखिम बढाउने भन्दै त्यसबेला नेतृत्वले त्यसलाई रोक्न पहल गरेको उनको भनाइ छ।

उनका अनुसार तत्कालीन महामन्त्रीहरूले उठाएका विषयहरू सम्बोधन गर्न सभापति देउवाले स्वयं छलफल आह्वान गरेका थिए र राष्ट्रिय सभा तथा समानुपातिकतर्फका उम्मेदवार चयनमा सहमतिअनुसार निर्णय गरिएको थियो। प्रत्यक्षतर्फको टिकट वितरणमा समेत पार्टी एकता जोगाउन लचकता देखाउन आग्रह गरिएको खड्काको दाबी छ।

पार्टीभित्र देखिएको वर्तमान अवस्थाका लागि सभापतिलाई दोषारोपण गरिएकोप्रति आपत्ति जनाउँदै खड्काले विशेष महाधिवेशन बोलाउने अधिकार विधानअनुसार तत्कालीन महामन्त्रीहरूलाई नरहेको स्पष्ट पारे।