काठमाडौं ९ माघ । वामचालु आर्थिक वर्षमा नेपाल राष्ट्र बैंकले विकास बैंक र फाइनान्सका १५ प्रमुख कार्यकारी अधिकृतलाई कारबाही गरेको छ। ६ महिनामा राष्ट्र बैंकले विकास बैंकका ७ र फाइनान्सका ८ प्रमुख कार्यकारी अधिकृतलाई कारबाही गरेको हो।

राष्ट्र बैंकको वित्तिय संस्था सुपरिक्षण विभागले साउनदेखि पुस मसान्तसम्म २ सञ्चालक समेत कारबाही गरेको छ। पोखरा फाइनान्स र सेन्ट्रल फाइनान्सका सञ्चालक कारबाहीमा परेका छन्।

पुनर्कर्जा, व्यावसायिक निरन्तरता कर्जा र सहुलियतपूर्ण कर्जा सदुपयोग नभएको भन्दै ७ विकास बैंकका सीईओ कारबाहीमा परेका छन्। जसमा लुम्बिनी विकास बैंक, महालक्ष्मी विकास बैंक, कामना सेवा विकास बैंक, मुक्तीनाथ विकास बैंक, सालपा विकास बैंक, गरिमा विकास बैंक र सप्तकोशी विकास बैंकका सीईओलाई राष्ट्र बैंकले सचेत गराएको हो।

वित्त कम्पनीतर्फ समृद्धि फाइनान्स, पोखरा फाइनान्स, प्रोगेसिभ फाइनान्स, आईसीएफसी फाइनान्स, जानकी फाइनान्स, सेन्ट्रल फाइनान्स, रिलायन्स फाइनान्स, गुडविल फाइनान्सका सीईओलाई कर्जा दिइएको विषयमा कारबाही गरेको जनाएको छ।