काठमाडौं २५ पुस । रास्वपा सभापति रवि लामिछानेलाई फेरि पक्राउ गरेर काठमाडौं पठाउने कि आफैं काठमाडौं जिल्ला अदालतमा हाजिर हुन दिने भन्ने परामर्शमा कास्की प्रहरी जुटेको छ । कास्की जिल्ला अदालतले लामिछानेलाई ६५ लाख धरौटीमा छोड्ने आदेश दिएसँगै अब के हुने भन्ने प्रश्न उठेको हो ।

लामिछानेविरुद्ध काठमाडौं जिल्ला अदालतमा पनि सहकारी ठगीमा मुद्दा दर्ता भएको छ । कास्की प्रहरीको उच्च स्रोतका अनुसार कानुन व्यवसायीसँग परामर्श सुरु भएको छ ।

ुयहाँको जिल्ला अदालतले धरौटीमा छोड्ने आदेश गरिसकेको छ । काठमाडौंमा पनि अभियोगपत्र दर्ता भएको छ । अब यहाँबाट पक्राउ गरेर काठमाडौंलाई बुझाउने कि पक्राउ नगरी आफैं अदालतमा उपस्थित हुन दिने भन्नेबारे कानुन व्यवसायीहरूसँग छलफल गरिरहेका छौं,ु कास्की प्रहरीका उच्च अधिकारीले भने । काठमाडौंको स्वर्णलक्ष्मी सहकारी ठगीमा लामिछानेलाई प्रतिवादी बनाएर मुद्दा दायर भएको छ ।

लामिछानेले कास्की जिल्ला अदालतमा धरौटी बुझाउने प्रक्रिया भने सुरु गरिसकेका छन् । सहकारी ठगी, संगठित अपराध र सम्पत्ति शुद्धीकरण मुद्दामा लामिछानेसँग जिल्ला अदालत कास्कीले धरौटी मागेको थियो ।

पोखराको सूर्यदर्शन सहकारीको बचत रकम अपचलनसँगै संगठित अपराध र सम्पत्ति शुद्धीकरण मुद्दामा लामिछानेसँग कास्की जिल्ला अदालतले धरौटी मागेको थियो । कास्की जिल्ला अदालतका न्यायाधीश नीतिज राईको इजलासले लामिछानेलाई ६५ लाख रुपैयाँ धरौटीमा छाड्ने आदेश दिएका हो ।

न्यायाधीश राईको इजलासमा बिहीबार सरकारी वकिलहरूको जवाफी बहससँगै उक्त मुद्दामा थुनछेक बहस सकिएको थियो । बिहीबार उच्च सरकारी वकिल कार्यालयका उपन्यायधिवक्ता गोविन्दराज गौली र जिल्ला सरकारी वकिल कार्यालयकी जिल्ला न्यायाधिवक्ता कमला काफ्लेले जवाफी बहस गरेका थिए ।

न्यायाधीश राईको इजलासमा पुस १६ गतेदेखि उक्त मुद्दाका सात जना प्रतिवादीहरूको थुनछेक बहस हुँदै आएको थियो । प्रतिवादीहरूका तर्फबाट कानुनी व्यवसायीहरूको बहसपछि बुधबार सहकारीपीडितहरूका तर्फबाट कानुन व्यवसायीहरूले बहस गरेका थिए । उक्त सहकारीको रकम अपचलन मुद्दामा लामिछानेसहित पूर्वडीआईजी छविलाल जोशी, लीला पछाईँ, कृष्णबहादुर गुरुङ, रामबहादुर खनाललगायतमाथि थुनछेक बहस भएको थियो ।