काठमाडौं ९ पुस । अमेरिकाका पूर्वराष्ट्रपति बिल क्लिन्टन ज्वरो आएपछि अस्पताल भर्ना भएका छन्। वासिङ्टन डीसीस्थित एक अस्पतालमा उनको परीक्षण भइरहेको उनका एक प्रवक्ताले जानकारी दिएका छन्।
‘राष्ट्रपति ठिक छन्,’ क्लिन्टनका डेपुटी चिफ अफ स्टाफले भनेका छन्। क्रिसमसमा घर फर्किनेमा क्लिन्टन आशावादी रहेको उनको भनाइ छ।
७८ वर्षीय क्लिन्टन बिरामी हुँदा वासिङ्टनस्थित घरमै थिए। उनलाई मेडस्टार जर्जटाउन युनिभर्सिटी हस्पिटल लगिएको हो।
२४ वर्षअघि ह्वाइट हाउस छाडेयता क्लिन्टनले अनेकौँ स्वास्थ्य समस्या झेलेका छन्। २००४ मा उनको मुटुको बाइपास सर्जरी गरिएको थियो।
त्यसको अर्को वर्ष उनको फोक्सोमा गम्भीर समस्या आएको थियो भने २०१० मुटुमा दुईवटा स्टेन्ट राखिएको थियो।
२०२१ मा पिसाब संक्रमणका कारण उनी ६ दिन अस्पताल बसेका थिए। एजेन्सी
प्रतिक्रिया दिनुहोस्