काठमाडौं । नेपाली कांग्रेसभित्रको एकता र सभापति गगन थापाको नेतृत्वमा पार्टी एकढिक्का भएको सन्देश कोशी प्रदेशमा स्पष्ट रूपमा देखिएको छ । सोमबार विराटनगरमा आयोजित कोशी प्रदेशस्तरीय कार्यकर्ता भेटघाट तथा प्रशिक्षण कार्यक्रममा सभापति गगन थापा, वरिष्ठ नेता डा. शेखर कोइराला र पूर्व उपसभापति विजयकुमार गच्छदार एकै मञ्चमा उभिएर एकताको सन्देश दिएका छन् ।

कार्यक्रम सुरु हुनुअघि नै सभापति थापालाई स्वागत गर्न डा. कोइराला आफैं विमानस्थल पुगेका थिए । यो दृश्यले पार्टीभित्रको एकताको प्रतीकात्मक महत्व बोकेको छ । मञ्चमा महामन्त्री गुरुराज घिमिरे, कोशी प्रदेश सभापति उद्धव थापा, पूर्व सहमहामन्त्री भीष्मराज आङदेम्बे, नेताहरू ज्ञानेन्द्रबहादुर कार्की, सुनिल थापा, रामहरि खतिवडालगायत पनि उपस्थित थिए ।

पार्टी सभापति बनेपछि पहिलोपटक सोमबार विराटनगरमा कोशी प्रदेशस्तरीय कार्यकर्ता भेलालाई सम्बोधन गर्दै सभापति थापाले भने, ‘कुनै एउटा व्यक्तिले आएर चमत्कार गर्छु भनेर भ्रष्टाचार नियन्त्रण हुँदैन। विगतमा संस्थाहरूलाई पङ्गु बनाएका छौँ। अब ती संस्थाहरूलाई बलियो बनाउँछौँ।’ 

उनले विधिको शासनमा कुनै सम्झौता नहुने दृढता व्यक्त गरेका छन्।

‘कोही सत्ताको नजिक छ, लोकप्रिय छ भनेर कानुन फरक हुँदैन। कानुन सबैका लागि बराबर हुनुपर्छ,’ उनले भने।

सभापति थापाले यो निर्वाचनमा कांग्रेसको पहिलो प्रतिबद्धता संविधानको निरन्तरता भएको बताए।

‘यो संविधान धेरै संघर्ष र उतारचढावपछि आएको हो,’  उनले भने, ‘यसलाई तलमाथि गर्दा ठूलो मूल्य चुकाउनुपर्छ।’

उनले संविधानभित्र सुधार आवश्यक भए पनि त्यो संवाद र सहमतिबाट मात्र सम्भव हुने बताए।

भदौ २३ र २४ का घटनालाई केवल आकस्मिक हिंसा नभई नागरिक असन्तुष्टिको विस्फोटका रूपमा व्याख्या गर्दै कांग्रेसले  मात्रै देश सम्हाल्न सक्ने दाबी उनले दोहोर्याए। 

उनले ती घटनापछि देखिएका राजनीतिक प्रतिक्रियालाई दुई प्रवृत्तिमा विभाजन गर्दै भने, ‘एउटा डिनायलको प्रवृत्ति देखियो—नागरिकमा  असन्तुष्टि नै छैन भन्ने, सबैलाई षड्यन्त्र र घुसपैठ भन्ने। अर्को डिभिडेण्ड खाने प्रवृत्ति—नौजवानको ज्यान गएको घटनाबाट राजनीतिक मुनाफा खोज्ने। कांग्रेस यी दुवै प्रवृत्तिको खिलाफमा छ।’ 

नेताहरूका भनाइ

• सभापति गगन थापा : चुनावमा पार्टी एकढिक्का भएर अघि बढेको छ । परिवर्तनलाई स्वीकार गर्दै एकजुट भएको कांग्रेसलाई जितबाट कसैले रोक्न सक्दैन । फागुन २१ को प्रतिनिधिसभा निर्वाचनमा संविधानको निरन्तरता मुख्य प्रतिबद्धता हो । संविधानभित्र बदल्नुपर्ने धेरै कुरा छन्, तर त्यसका लागि विश्वास र संवाद आवश्यक छ । यो नेतृत्व कांग्रेसबाहेक अरूले गर्न सक्दैनन् । बिग्रिएका कुरा सच्याएर अघि बढ्न तयार छौं ।
• नेता डा. शेखर कोइराला : सबै वर्ग, समुदायका लागि कांग्रेसले योजना बनाएको छ । जित अपरिहार्य छ । पार्टी एकढिक्का भएर निर्वाचन सामना गर्न तयार छ । शुद्धीकरणका लागि तयार छौं— ‘ऐना पुछेर होइन, अनुहारकै दाग मेटेर नेपाली कांग्रेसमा शुद्धीकरण हुन्छ ।’
• पूर्व उपसभापति विजयकुमार गच्छदार : कांग्रेस एक भएको छ, एक भएर नेपाली कांग्रेसले निर्वाचनको सामना गर्छ । त्यसैकारण आज मञ्चमा भएका हाम्रा नेताहरू, इतिहास बनाएका पुराना नेताहरू पनि गगनकुमार थापाको नेतृत्वमा चुनावमा जानुभएको छ ।

यो कार्यक्रमले कांग्रेसभित्रका गुटगत विवादलाई पछाडि पार्दै निर्वाचनमा एकजुट हुने सन्देश दिएको छ । विशेष गरी गगन थापाको नेतृत्वमा पुराना र नयाँ पुस्ताका नेताहरू एकै ठाउँमा उभिनुले पार्टीको एकता बलियो बनेको देखिन्छ ।