काठमाडौं २६ कात्तिक । भैरहवाको गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडान भएसँगै निजी क्षेत्र, पर्यटन व्यवसायी तथा स्थानीयहरू उत्साहित भएका छन् । लामो समयदेखि मलिन देखिएका पर्यटन व्यवसायीको मुहार उज्यालो भएको छ ।
गौतमबुद्ध अन्तर्राष्ट्रिय विमानस्थल निर्माणसँगै रुपन्देही तथा आसपास ठूला होटलहरु निर्माण शुरू भएका थिए । पाँचवटा पाँचतारे होटलसहित झण्डै दुई सय होटलको भविष्य अन्योलमा थियो । अहिले भने विमानस्थल सञ्चालनसँगै होटल व्यवसायी हौसिएका छन् ।
अस्ति शनिवार मात्र भैरहवा विमानस्थलबाट जजिरा एयरलाइन्स, फ्लाइ दुबई र नेपाल एयरलाइन्सले अन्तर्राष्ट्रिय उडान शुरू गरेका छन् । एयर एशियाले भने एक हप्तापहिलेदेखि नियमित उडान शुरू गरेको थियो ।
त्यस्तै, कतार एयरवेज, एयर अरेबियाले पनि भैरहवाबाट उडानका लागि चासो देखाएका छन् । गौतमबुद्ध अन्तर्राष्ट्रिय विमानस्थलका महाप्रबन्धक प्रतापबाबु तिवारीले लामो समयदेखि सञ्चालन हुन नसकेको विमानस्थल सञ्चालनमा आउँदा उड्डयनकर्मीसहित सबै क्षेत्रमा उत्साह थपिएको बताउनुभयो ।
उडान बढ्दा विमानस्थलका कर्मचारी मात्र नभई समग्र पर्यटन व्यवसायी तरङ्गित बनेका छन् । लुम्बिनी होटल सङ्घका अध्यक्ष गोविन्द ज्ञवालीले चारवटा उडानले पर्यटन व्यवसायीमा आशा जगाएको बताउनुभयो । पर्यटन व्यसायसँगै निजी क्षेत्र पनि विमानस्थल सञ्चालनले हौसिएको छ ।
सिद्धार्थ उद्योग वाणिज्य सङ्घका अध्यक्ष ठाकुरकुमार श्रेष्ठले उद्घाटन भएको अढाई वर्षपछि भएको चहलपहलले निजी क्षेत्रमा उत्साह जागेको बताउनुभयो । यसको निरन्तरतामा भने व्यवसायीहरुले आशङ्का व्यक्त गरेका छन् ।
वैदेशिक रोजगार व्यवसायीहरुले भैरहवामा कार्यालय नराखेको, स्वास्थ्य परीक्षण गर्न अझै काठमाण्डौ धाउनुपर्ने, पहिलोपटक श्रमका लागि काठमाण्डौ जानुपर्ने बाध्यता अझै देखिन्छ ।
प्रतिक्रिया दिनुहोस्