काठमाडौं १४ कात्तिक । नेपालले आइसिसी विश्वकप लिग(२ मा साविक विजेता स्कटल्यान्डमाथि सहज जित निकालेको छ ।

अमेरिकाको टेक्ससस्थित ग्रान्ड पिएरे मैदानमा मङ्गलबार राति भएको खेलमा नेपालले स्कटल्यान्डलाई पाँच विकेटले हरायो ।नेपालले लिगमा आठ महिनापछि जित निकालेको हो । लिग(२ मा यसअघि नेपालले घरेलु मैदानमा गत फेब्रुअरीमा नेदरल्यान्ड्सलाई एउटा खेलमा हराएको थियो ।

जितका लागि एक सय ५५ रनको मध्यम लक्ष्य पछ्याएको नेपालले २९।५ ओभरमा पाँच विकेटको क्षतिमा पूरा गरेको थियो ।

नेपालका लागि आरिफ शेखले ४२ बलमा आठ चौकाको मद्दतले अविजित ५१ रन बनाउनुभयो । गुलशन झाले अविजित २५, कुशल भुर्तेलले २५, आसिफ शेखले २१ र अनिल साहले १३ रन बनाउनुभयो ।

बलिङमा स्कटल्यान्डका ब्रेन्डन म्याकमुलनले दुई विकेट लिनुभयो । ब्राण्ड करी, मार्क वाट र ज्याक जार्विसले एक एक विकेट लिनुभयो ।

यसअघि टस हारेर ब्याटिङको निम्तो पाएको स्कटल्यान्डले ४१।४ ओभरमा सबै विकेटको क्षतिमा एक सय ५४ रन बनाएको थियो ।

स्कटल्यान्डका लागि मार्क वाटले सर्वाधिक ३४ रन बनाउनुभयो । कप्तान रिची बेरिङ्गटन र माइकल जोनसले १९र१९, ब्रेन्डन म्याकमुलनले १६, म्याथ्यु क्रसले १५ र माइकल लिस्कले १४ रन बनाउनुभयो ।

बलिङमा नेपालका सन्दीप लामिछानेले तीन विकेट लिनुभयो । करण केसी, सोमपाल कामी र गुल्शन झाले दुई दुई तथा आरिफ शेखले एक विकेट झार्नुभयो ।

यस सिरिजको पहिलो खेलमा नेपाल अमेरिकासँग तीन विकेटले पराजित भएको थियो । अब नेपालले शनिबार घरेलु टोली अमेरिकासँग प्रतिस्पर्धा गर्नेछ । नेपालले चौथो तथा अन्तिम खेल कात्तिक १९ गते स्कटल्यान्डसँग खेल्नेछ ।

जितसँगै १० खेलमा पाँच अङ्क बनाएको नेपाल सातौँ स्थानमा छ । पराजित स्कटल्यान्ड नौ खेलबाट ११ अङ्क जोड्दै चौथो स्थानमा छ ।