काठमाडौं ८ भदौ । राष्ट्रिय स्वतन्त्र पार्टी का सभापति रवि लामिछानेले आफूलाई पक्राउ गर्ने उद्देश्यले उनका पूर्व सहकर्मी तथा पूर्व डीआइजी छविलाल जोशीलाई पक्राउ गरिएको दाबी गरेका छन्।

मंगलबार साँझ फेसबुक लाइभबाट लामिछानेले ग्यालेक्सी टीभीका संचालक पूर्व डीआइजी जोशीलाई पक्राउ गरेर आफूलाई पनि पक्राउ गर्न षड्यन्त्र गरिएको बताए। लामिछानेले आफ्नो बोल्ने माध्यम फेसबुक मात्र रहेको भन्दै मूलधारका मिडियाका समाचारहरुमाथि अन्तराष्ट्रिय संस्थालाई अनुगमन गरिदिन पनि आग्रह गरे ।

उनले आफू संसदीय छानबिन समितिले गरेको सिफारिस कार्यान्वयनका लागि तयार रहेको भन्दै आफू ग्यालेक्सी टेलिभिजनमा रहँदा भएको ‘आर्थिक अपचलन’को जिम्मेवारी लिन तयार रहेको पहलिो पटक बताएका छन
फेरि पनि उनले षड्यन्त्र गरे प्रतिवाद गर्न आफ्न समर्थकलाई आह्वान गरेका छन् ।

‘कानुनी प्रक्रियामा मेरो पूर्णरूपले साथ रहन्छ। मैले कहाँ आउनुपर्छ, मैले बयान दिन आउनुपर्छ कि, मैले पोखरा जानुपर्छ कि काठमाडौं आउनुपर्छ कि, कहाँ जानुपर्छ, म तयार छु। म थुनिनुपर्छ कि, तयार छु। म हिरासत बस्नुपर्छ कि, म तयार छु। तर, षड्यन्त्र गरेर होइन, झुक्याएर, छक्याएर, छलेर होइन’ उनले भने।

आफूलाई तत्काल पक्राउ नगरे पनि दशैंको बेला काठमाडौं सुनसान हुने बेला पक्राउ गर्न सकिने भय व्यक्त गर्दै जस्तो बेला भएपनि आफ्ना समर्थकलाई प्रतिरोध गर्न पटक पटक उनले आग्रह गरे ।

उनले भने, ‘मलाई पक्राउ गर्न दशैं कुर्नु पर्दैन। आधार प्रमाणले यी चिजहरू देखियो भन्नुस्, मेरो झोला रेडी छ। तर, छलछाम स्वीकार्य छैन।’
आफू सहकारी ठग नभएको पटक पटक दोहराएका लामिछानेले ३८ मिनेट लामो फेसबुक प्रवचनमा मूलधारका मिडिया, जिवि राइको लगानी अन्नपूर्ण पोष्टमा पनि भएको, मिडियाले आफूलाई खेदिरहेको र कांग्रेस एमालेका नेताहरुप्रति चर्को असन्तुष्टि व्यक्त गरे । संसदीय सहकारी छानविन समितिका सभापति सूर्य थापालाई छानविन गरेको कुरा सवै प्रतिवेदनमै भएकाले अन्तर्वार्ता दिंदै नहिंड्न पनि चेतावनी दिएका छन् ।