धनगढी २ जेठ । भारतबाट सामान ल्याएर आउनेहरुलाई प्रहरीले जाँच गर्दा कञ्चनपुरमा तनाव सृजना भएको छ।

भन्सार छलि गरी ल्याइरहेको सामान जाँच गर्दा पश्चिमी सीमा नाका गड्डाचौकी नजिक सुकासाल क्षेत्रमा विवादले उग्ररुप लिएपछि भएपछि प्रहरीमाथि आक्रमण भएको हो।

जिल्ला प्रहरी कार्यालय कञ्चनपुरका अनुसार भारतबाट सामान ल्याउनेहरुले जाँचका क्रममा विवाद भएपछि सुकासालस्थित अस्थायी प्रहरी बिट ढालेका छन्।

सुकासालस्थित अस्थायी प्रहरी बिटबाट जाँचमा खटिएका प्रहरीमाथि आक्रमण भएको जिल्ला प्रहरी कार्यालय कञ्चनपुरका डीएसपी प्रकाश डाँगीले जानकारी दिए।

उनका अनुसार सो क्रममा ४ जना प्रहरी घाइते भएका छन्। घटनामा संलग्न ५ जनालाई नियन्त्रणमा लिइएको प्रहरीले जनाएको छ। अहिले सो क्षेत्रमा बाक्लो संख्यामा सुरक्षाकर्मी परिचालन गरिएको छ।

सीमावर्ती भारतीय बजार बनबासाबाट सामान बोकेर जीविकोपार्जन गर्नेहरुले भन्सार, सशस्त्र प्रहरीले जाँच गरेपछि सुकासाल क्षेत्रमा फेरि प्रहरीले जाँच गरेर अनावश्यक दुःख दिने गरेको आरोप लगाएका छन्।

यही विषयमा बनबासाबाट सामान क्यारिङ्ग गर्नेहरुको सुकासालमा प्रहरीसँग विवाद भएको थियो।