काठमाडौँ, ३१ वैशाख । सत्तारूढ नेपाली कांग्रेसका सांसद एवम् पूर्वराज्यमन्त्री सञ्जय गौतम विकास निर्माणका विभिन्न माग राख्दै आमरण अनशनमा बसेका छन् ।

बर्दिया क्षेत्र नम्बर १ बाट प्रतिनिधिसभा सदस्य निर्वाचित गौतमले जब्दीघाटको भत्किएको पुलमुनि टेन्ट लगाएर आमरण अनशन सुरू गरेका हुन् ।

उनले विभिन्न १५ बुँदे मागहरूको सूची अनशनस्थलमा राखेका छन् । सूचीको पहिलो नम्बरमा जब्दीघाटको भत्किएको पुल निर्माणको काम सुरू गर्नुपर्ने माग उल्लेख गरेका छन् ।

सदरमुकाम गुलरिया र बारबर्दिया नगरपालिका जोड्ने जब्दीघाटको पुल बनेर उद्घाटन नहुँदै २०७४ साउन अन्तिम साता भत्किएको थियो । यो पुल पप्पु कन्स्ट्रक्सनले बनाएको थियो ।

सांसद गौतमले जिल्ला सदरमुकाम डुबान र कटानको कारण जोखिममा रहेको भन्दै तटबन्धनका काम गर्नुपर्ने, सिंचाइ आयोजनाहरूमा बजेट सुनिश्चित हुनुपर्नेलगायतका माग पनि राखेका छन् ।