काठमाडौँ, ३० वैशाख । नेपाल समाजवादीका अध्यक्ष एवम् पूर्वप्रधानमन्त्री डा.बाबुराम भट्टराईले आफू अपराधी छैन भने भाग्नु नपर्ने प्रतिक्रिया दिएका छन् ।

शनिबार काठमाडौँको नक्सालमा आयोजित भ्रष्टाचारविरूद्धको प्रदर्शनमा सहभागी हुँदै भट्टराईले यस्तो प्रतिक्रिया दिएका हुन् । नेपालीलाई नक्कली भुटानी शरणार्थी बनाएर रकम असुलेको आरोप लागेसँगै नेकपा (एमाले)का सांसद टोपबहादुर रायमाझी फरार छन् । फरार रायमाझीलाई इंगित गर्दै भट्टराईले भने, “आफू अपराधी छैन भने भाग्नुपर्दैन, भागेपछि बेठिक भयो ।”

प्रहरीले खोजी गरिरहेको भए पनि रायमाझी सम्पर्कमा आएका छैनन् । एमालेले उनलाई पार्टी सचिवबाट निलम्बन गरी सकेको छ । यससँगै पूर्वगृहमन्त्री बालकृष्ण खाणलाई पनि यसै प्रकरणमा प्रहरीले पक्राउ गरी अनुसन्धान गरिरहेको छ ।

नक्कली भुटानी शरणार्थी प्रकरणको छानबिन निष्पक्ष गरियोस् र यसमा कुनै ढाकछोप नहोस् भन्दै देशैभर विरोध र प्रदर्शनहरू भएका छन् ।

काठमाडौँको माइतीघरसहित नक्सालमा पनि नागरिक अगुवाहरू मिलेर भ्रष्टाचार र भ्रष्टाचार ढाकछोपविरूद्ध अभियान सुरू गरेका छन् ।

नेपालीलाई भुटानी शरणार्थी बनाएर अमेरिका पठाउने नाममा ठगी गरेको आरोपमा हालसम्म १२ जना पक्राउ परेका छन् । प्रहरीले पूर्वगृहमन्त्री एवम् नेपाली कांग्रेसका केन्द्रीय सदस्य बालकृष्ण खाण, उनका स्वकीय सचिव नरेन्द्र केसी, पूर्वगृहमन्त्री रामबहादुर थापा ‘बादल’का सुरक्षा सल्लाहकार इन्द्रजित राई, नेपाल सरकारका सचिव टेकनारायण पाण्डे, सन्दीप रायमाझी, केशव दुलाल, सानु भण्डारी, टंक गुरूङ, सन्देश शर्मा पोखरेल र सागर थुलुङलाई पक्राउ गरिसकेको छ ।

उक्त घटनका अर्का आरोपित नेकपा (एमाले)का सचिव तथा पूर्वउपप्रधानमन्त्री टोपबहादुर रायमाझी भने फरार रहेकाले प्रहरीले खोजी गरिरहेको जनाएको छ ।

जिल्ला प्रहरी परिसरले उनीविरूद्ध संगठित अपराधमा अनुसन्धान गरिरहेको छ । उक्त घटनामा हालसम्म १०६ जनाले २० वटा जाहेरी दिइसकेको बताइएको छ । उक्त घटनाका पीडितहरूले कुल २३ करोड २५ लाख ठगी भएको जाहेरीमा उल्लेख गरेका छन् ।