काठमाडौँ, २१ वैशाख । नवनियुक्त तीन मन्त्रीले आज पद तथा गोपनीयताको शपथ ग्रहण गर्दै छन् । नेपाली कांग्रेसबाट मन्त्री बनेका धनराज गुरूङ, मोहन बस्नेत र डिगबहादुर लिम्बूले आज शपथ ग्रहण गर्न लागेका हुन् । नवनियुक्त मन्त्रीहरूको शपथ समारोह आज दिउँसो ३ बजे हुने राष्ट्रपति कार्यालयले जनाएको छ ।

प्रधानमन्त्री पुष्पकमल दाहाल ‘प्रचण्ड’ले बुधबार गुरूङलाई कानुन, बस्नेतलाई स्वास्थ्य र लिम्बूलाई युवा तथा खेलकुदमन्त्रीमा नियुक्त गरेका थिए । तीन मन्त्री थपिएसँगै २२ सदस्यीय भएको छ ।

प्रधानमन्त्री प्रचण्डले पछिल्लो पटक ३ वैशाखमा मन्त्रिपरिषद् विस्तार गरेका थिए । त्यतिबेला उनले नेपाली कांग्रेसका एनपी साउदलाई परराष्ट्रमन्त्री र नेकपा (एकीकृत समाजवादी)का सांसद नन्द चपाईंलाई भौतिक पूर्वाधार तथा यातायात राज्यमन्त्रीमा नियुक्त गरेका थिए ।

त्यसअघि १७ चैतमा सातौँ पटकको विस्तारमा कांग्रेसबाट ४ जना मन्त्री नियुक्त भएका थिए । त्यो बेला पूर्णबहादुर खड्का उपप्रधान तथा रक्षा, डा.प्रकाशशरण महत अर्थ, सीता गुरूङ सहरी विकास र रमेश रिजाल उद्योग वाणिज्य तथा आपूर्तिमन्त्री नियुक्त भएका थिए । त्यसअघि, १७ फागुन, १४ फागुन, २३ माघ, १४ माघ र ३ माघमासमेत मन्त्रिपरिषद् विस्तार भएको थियो । प्रचण्डले ११ पुसमा प्रधानमन्त्रीको शपथ लिएका थिए ।

नवौँ पटक मन्त्रिपरिषद् विस्तारको तयारी भए पनि सरकारले भने अझै पूर्णता पाउन सकेको छैन । सत्ता गठबन्धनबीच मन्त्रालय बाँडफाँड गर्दा वन मन्त्रालय जनता समाजवादी पार्टी र खानेपानी मन्त्रालय जनमत पार्टीको भागमा परेको थियो । तर, जनमत सरकारबाट बाहिरिएपछि अहिले खानेपानी मन्त्रालय नेतृत्वविहीन छ । साथै, जसपाले वन मन्त्रालयका लागि अहिलेसम्म प्रधानमन्त्रीकहाँ नाम पठाएको छैन ।