काठमाडौँ, १६ माघ । जनताको लामो संघर्षपछि प्राप्त भएको संविधानलाई सबै नागरिकको साझा सम्पत्ति बनाउन जोड दिइएको छ ।

नेपाल तथा एशियाली अनुसन्धान केन्द्र(सिनास), हामी नागरिक नेपाल र प्रज्ञा फाउण्डेशनले आज यहाँ आयोजना गरेको देशको इतिहास र संस्कृति अन्तरक्रिया कार्यक्रममा सहभागी वक्ताले संविधानमा सबै जाति समुदायको भावनालाई सम्बोधन गर्न सुझाएका हुन् ।

पूर्वप्रशासक एवं प्राध्यापक शम्भुराम सिंखडाले विभिन्न जाति र समुदायले एकअर्काका भाषा र संस्कृतिलाई स्वीकार्नुपर्नेमा जोड दिँदै सांस्कृतिक रुपमा एकताबद्ध भई सामाजिक सद्भाव कायम गर्न सकिने बताउनुभयो ।

प्रज्ञा फाउण्डेशनका अध्यक्ष आनन्द आदित्यले मुलुक स्वतन्त्र राज्यका रुपमा स्थापित भएको करिब अढाई शताब्दी (२५० वर्ष) पुगेको भए पनि यहाँका विविध जाति फरक संस्कृतिलाई एकताबद्ध गर्न नसकिएको बताउनुभयो ।

पूर्वराजदूतहरु नवलकिशोर राई, डा दुर्गेशमान सिंह र विजयकान्त कर्णले संविधान एउटा विधि र प्रक्रियाबाट निर्माण भएको भए पनि यसमा भएका केही त्रुटिलाई समयसापेक्ष सुधार गर्दै लैजानुपर्नेमा जोड दिनुभयो । राज्य निर्माणका क्रममा इतिहासमा गरिएका राम्रा तथा नराम्रा सबै विषयको मूल्यांकन गरी सबै जातिका विविधतालाई सम्बोधन गर्न उहाँहरुको माग थियो ।

सिनासका कार्यकारी निर्देशक डा मृगेन्द्र कार्कीले हरेक नागरिकमा म नेपाली हुँ भनेर गर्व गर्नसक्ने भावनाको जागृत गराउन सरकार र राजनीतिक दलहरुले असफल भएको टिप्पणी गर्नुभयो ।

कार्यक्रमका संयोजक पूर्व मुख्यसचिव दामोदर गौतम, शहीद कुलदीप झाका भतिजा नवीन झा, व्यवसायी भरत बस्नेत, चतुर्थाम्स सहस्राब्दी समारोह समिति नेपालका सदस्यसचिव विनोद भट्टले संविधानलाई सबैको अपनत्व हुने गरी साझा बनाउनपर्नेमा जोड दिनुभयो ।