काठमाडौँ, १३ चैत । प्रधानमन्त्री पुष्पकमल दाहाल ‘प्रचण्ड’लाई मन्त्रिपरिषद् विस्तार गर्न अझै केही दिन लाग्ने भएको छ ।
सत्ता गठबन्धन दलबीच मन्त्रालयको संख्या बाँडफाँडमा कुरा नमिल्दा प्रधानमन्त्री प्रचण्डलाई मन्त्रिपरिषद् विस्तार गर्न सकस परेको हो । प्रचण्डले आइतबार बिहानदेखि सत्तारूढ दलसँग छुट्टाछुट्टै छलफल गरे पनि कुनै टुंगोमा पुग्न सकेनन् ।
सोही कारण गठबन्धन दलको संयुक्त बैठक पनि बस्न सकेको छैन । यसअघि सोमबार नै सरकार विस्तार गर्ने प्रचण्डको तयारी थियो ।
गठबन्धनको ठुलो दल नेपाली कांग्रेसले उपसभापति पूर्णबहादुर खड्काको नेतृत्वमा र नेकपा (एकीकृत समाजवादी)ले उपाध्यक्ष वेदुराम भुसालको नेतृत्वमा सरकारमा सहभागी हुने तयारी गरेका छन् । यस्तै, लोकतान्त्रिक समाजवादीबाट शरतसिंह भण्डारी, नागरिक उन्मुक्तिबाट अध्यक्ष रञ्जिता श्रेष्ठ सरकारमा सहभागी हुँदै छन् ।
चैत ६ गते प्रतिनिधिसभाबाट विश्वासको मत लिएका प्रधानमन्त्री प्रचण्डले एक साता बित्दा पनि सरकार विस्तार गर्न सकेका छैनन् ।
कांग्रेसले अर्थसहित कम्तिमा ८ मन्त्रालय दाबी गरेको छ । माओवादी केन्द्रले गृह मन्त्रालय पनि लिन चाहेको छ भने एकीकृत समाजवादीले कम्तिमा ३ मन्त्रालय दिनुपर्ने अडान राख्दै आएको छ ।
प्रतिक्रिया दिनुहोस्