काठमाडौं ११ फागुन । मंसिर ४ गतेको चुनाव हुनु केही दिनअघिसम्म एउटै गठबन्धनमा रहेका चार दलहरूको बैठक बिहीबार साँझ बस्दैछ।
राष्ट्रपतिको चुनाव सँगसँगै पुरानो गठबन्धन पनि ब्युँताउने नेपाली कांग्रेस र माओवादी केन्द्रको अनौपचारिक सहमतिपछि आज चार दलका नेताहरू बस्न लागेका हुन्।

नेपाली कांग्रेस, माओवादी केन्द्र, नेकपा (एकीकृत समाजवादी) र जनता समाजवादी पार्टीका नेताहरूबीच बैठक बस्न लागेको हो।
‘आज साँझ बैठक बस्दैछ। ठाउँ टुंगो लागेको छैन,’ एकीकृत समाजवादीका एक नेताले भने।
चार दलको बैठकअघि जसपा नेताहरूले प्रधानमन्त्री पुष्पकमल दाहाल ‘प्रचण्ड’ सहित माओवादी केन्द्रका नेताहरूसँग बैठक गर्दैछन्। जसपा र माओवादीबीच दिउँसो ३ बजे कुराकानी हुने बताइएको छ।
यसअघि आजै प्रधानमन्त्री प्रचण्डले एकीकृत समाजवादीका अध्यक्ष माधवकुमार नेपालसँग सिंहदरबारमा भेटवार्ता गरेका थिए।
आज सांझ हुने बैठकले नयां सत्ता गठबन्धनको स्वरुप र राष्ट्रपतिको गैर वामपन्थी उमेद्वारको टुंगो लगाउने छ । स्रोतका अनुसार नेका–माके–एस–जसपा–जनमत सहतिको गठबन्धनबाट नेका बरिष्ठ नेता रामचन्द्र पौडेल राष्ट्रपतिको उमेद्वार बन्नेछन् । अझैसम्म पनि नेका नेता कृष्ण सिटौलाले राष्ट्रपतिको उमेद्वार बन्न कोशिश गरिरहेका छन् ।