काठमाडौँ, २२ बैशाख । नेपाली कांग्रेसका वरिष्ठ नेता रामचन्द्र पौडेलले नेकपा (माओवादी केन्द्र) कांग्रेसको प्रतिष्पर्धी नभएको बताउनुभएको छ । बिहीबार चितवनको भरतपुरमा आयोजित चुनावी सभामा बोल्दै नेता पौडेलले यस्तो बताउनुभएको हो ।

नेपाली कांग्रेसबाट भरतपुर महानगरपालिकामा स्वतन्त्र उम्मेदवारी दिनुभएका नेता जगन्नाथ पौडेलसँग भेटेको बताउँदै उहाँले नेपाली कांग्रेसको प्रतिष्पर्धी माओवादी नभइ नेकपा (एमाले) भएको बताउनुभयो । वरिष्ठ नेता पौडेलले मेयरका उम्मेदवार पौडेल पक्षहरू आफ्नो तर्क सुन्न नचाहेको र इमोशनमा, भावावेशमा, एउटा उत्तेजनामा उम्मेदवारी दिइरहेको आरोप लगाउनुभयो । कांग्रेसको अहिलेको प्रतिष्पर्धा एमालेसँग भएको र ओली प्रवृतिसँग आफ्नो असहमति र द्वन्द्व रहेको उहाँको भनाइ छ ।

वरिष्ठ नेता पौडेलले आफूलाई केही नेता, कार्यकर्ताहरूले नपाली कांग्रेसका सभापति एवं प्रधानमन्त्री शेरबहादुर देउवासँग मिल्न गएको भन्ने आरोप लगाइरहे पनि त्यो यथार्थ नभएको जिकिर गर्नुभयो । पौडेलले गठबन्धनको आह्वान प्रधानमन्त्री देउवाले भन्दा पहिला आफूले गरेको उद्घोष गरेको स्मरण गराउनुभयो । नेकपा (एमाले) का अध्यक्ष केपी शर्मा ओलीले निरंकुशतातिर देशलाई लैजान थालेपछि आफूले नै गठबन्धनको आह्वान गरेको उहाँको भनाइ छ ।

वरिष्ठ नेता पौडेलले जनताको मतबाट चुनिएर आएका नेताहरूबाट नै प्रजातन्त्रमाथि खतरा रहेको भन्दै त्यसको निमित्त बनेर ओली आएको आरोप लगाउनुभयो । नेपालको विकासलाई ओलीले अल्मल्याएर देशको राजनीतिलाई अस्थिरतातर्फ लगेको उहाँको आरोप छ ।