नेपाल राष्ट्र बैंकका गभर्नर महाप्रसाद अधिकारी बुधबारदेखि काममा फर्किनुभएकाे छ । सर्वोच्च अदालतले मंगलबार काम गर्नबाट नरोक्न अन्तरिम आदेश दिएसँगै गभर्नर अधिकारी काममा फर्किनुभएकाे हाे । काममा फर्किएपछि उहाँले सरकारले संस्थाविरुद्ध आक्रमण गरेकाले आदलत जान बाध्य भएको बताउनुभयाे । ‘अदालतले अन्तिम फैसलामा पनि न्याय दिनेमा विश्वस्त छु’ उहाँले भन्नुभयाे ।

उहाँले आफूले व्यवसायिक ढंगले काम गर्ने र पूर्वाग्रह नराख्ने बताउनुभयाे । राष्ट्र बैंकको सरकारको आर्थिक सल्लाहकार भएको भन्दै उहाँले आफूले ‘बायस’ भएर काम नगर्ने दोहोर्‍याउनुभयाे । राष्ट्र बैंकमा हाजिर हुन पुगेका अधिकारीलाई कर्मचारीहरुले स्वागत गरेका थिए । स्वायत्त संस्थामा सरकारले हस्तक्षेप गरेको भन्दै राष्ट्र बैंकका कर्मचारीहरुले विरोध जनाएका थिए ।

सर्वोच्चको आदेशपछि  कुरा गर्दै गभर्नर अधिकारीले केन्द्रीय बैंकले न्याय पाएको प्रतिक्रिया दिनुभएकाे थियाे। अर्थमन्त्री जनार्दन शर्माले सरकारलाई असहयोग गरेकोसहित विभिन्न गम्भीर आरोपहरु लगाएर अधिकारीलाई निलम्बन गर्नुभएकाे थियाे ।