काठमाडौं, ७ पुस । तपाई दिनमा कति पल्ट हाँस्नुहुन्छ ? पक्कै पनि घत लाग्ने विषयले जिजिबिसामा लौ हो त भनेर जति पल्ट छुन्छ त्यति नै पल्ट हाँसिन्छ । हाँस्ने बेला कोही गलल हाँस्छ, कोही मुसूमुसू हाँस्छ । कोही नाकले हाँस्ला, कोही दातले हाँस्ला, कोही घाँटिभित्रै हुमहुम गर्दै हाँस्ला त कोही भने मनैमनै हासिदेला । हो, हामि सबैको यस्तै हाँस्ने आफनै विशेष तरिका हुन्छ । कसरी हाँस्ने भन्ने हाम्रो बस बाहिरको विषय हो । निद्रा लाग्दा हाई काढे जस्तै घत लाग्ने विषयमा मुस्कुराउनु वा हाँस्नु हाम्रो शरीरले जनाउने एक सामान्य स्वचालित प्रतिक्रिया हो ।

यहाँ,कुरा निकाल्नुको सन्दर्भ चाँही के हो भने व्यक्तिको हाँस्ने तरिकाले उसको स्वाभावबारे पत्ता लगाउन सकिने शास्त्रमा उल्लेख गरिएको छ । समुन्द्रशास्त्रमा व्यक्तिको हाँस्ने तरिकाको आधारमा उसको स्वभाव कस्तो हुन्छ भनि उल्लेख गरेको छ
खित्का छाडेर हाँस्ने व्यक्ति

जो व्यक्ति खित्का छाडेर हाँस्छन् उनीहरु उत्साही प्रवृत्तिको हुने शास्त्रमा उल्लेख । यस्ता व्यक्तिहरु उच्च बौद्धिक क्षमता भएका, सहनशील साथै मनमा छलकपट नभएका र आवश्यक परेको समयमा मानिसको सदैव सहयोग गर्न तयार रहने खालका हुने उल्लेख गरिएको छ :

जोड जोडले आवाज निकालेर हाँस्ने व्यक्ति

हाँस्ने बेला जोड जोडले आवाज निकालेर हाँस्ने व्याक्तिहरु स्वाभिमानी र परिश्रमी हुने शास्त्रमा उल्लेख छ । यस्ता व्यक्ति जीवनमा सफल हुने पनि उल्लेख गरिएको छ ।

मन्द मुस्कानसहित हाँस्ने व्यक्ति

यदि तपाई यस्तो किसिमले हाँस्ने समुहमा पर्नुहुन्छ भने बुझ्नुहोस तपाईलाई हत्तपत्त रिस उठ्दैन र कठिन समयमा पनि धैर्यताका साथ काम पूरा गर्नुहुन्छ । शास्त्रमा यसरी हाँस्ने व्यक्तिको स्वभाव गम्भिर प्रकृतीको हुने, बौद्धिक हुने र कठिन समयमा पनि धैर्यताका साथ काम गर्ने हुन्छन् भनी उल्लेख गरिएको छ ।

रोकिएर हाँस्ने व्यक्ति

कोही व्यक्ति हाँस्न पनि चर्को मूल्य लाग्ने जस्तो गरी हाँस्छन् । अर्थात् बीचमा रोकिएर हाँस्छन् । यस्ता व्यक्तिको बौद्धिक क्षमता सामान्य हुने र विवेकको सट्टा भावनाले निर्णय गर्ने हुन्छन् भनि शास्त्रमा उल्लेख छ । तर यस्ता व्यक्तिको बचत गर्ने बानी विशेष प्रकारले भरिएको हुन्छ भनि शास्त्रमा उल्लेख छ ।

तपाईको हाँस्ने तरिका र स्वभाव मिल्यो कि मिलेन त ? कमेन्ट गर्न कन्जुस्याई नगर्नु होला ।