काठमाडौं, २१ चैत्र ।  दुई दशकपछि बहुप्रतिक्षित मेलम्ची खानेपानी आयोजनाको पानी काठमाडौं उपत्यकामा झरेको छ । मेलम्चीबाट पहिलो चरणमा १७ करोड लिटर पानी काठमाडौंबासीले पिउन पाउनेछन् । तर काठमाडौं महानगरपालिकाका मेयर विद्यासुन्दर शाक्यले भने वर्तमान सरकारकै पहलमा याङ्ग्री र लार्के नदीको पानी काठमाडौं ल्याउनुपर्ने कुरालाई जोड दिएका छन् । झण्डै २२ वर्षपछि बहुप्रतिक्षित मेलम्ची खानेपानी आयोजनाको पानी काठमाडौं उपत्यकामा झरेको छ ।

मेलम्चीबाट १७ करोड लिटर पानी काठमाडौंबासीको धारामा झरेपनि यो पानी अझै अपर्याप्त नै हुनेछ किनभने काठमाडौंबासीको न्यूनतम खानेपानीको माग दैनिक ४३  करोड लिटर हो । मेलम्ची आयोजनाको योजना अनुसार मेलम्ची, याङ्ग्री र लार्केबाट १७/१७ करोड लिटर पानी गरि ५१ लिटर पानी भित्र्याउने योजना हो । लामो समयपछि १७ लिटर पानी मेलम्चीबाट काठमाडौंमा झर्नु उपत्यकाबासीको लागि पर्व जस्तै भएको काठमाडौं महानगरपालिका प्रमुख विद्यासुन्दर शाक्यले बताए ।

मेयर शाक्यले आफूले आफ्नो नेतृत्वमा मेलम्चीको पानी काठमाडौं आउने प्रतिबद्धता जाहेर गरेको ४ वर्षपछि काठमाडौंमा मलम्चीको पानी आएकोमा खुसी व्यक्त गर्नुभयो । उहाँले वर्षौदेखि उपत्यकाबासीले खानेपानीको गुनासो गर्दै आएकोले यो अयोजना छिटोभन्दा छिटो सम्पन्न गर्नुपर्ने धारणा राखे ।

त्यसो त प्रधानमन्त्री केपी शर्मा ओलीले सरकारले विकास निर्माणको कामलाई जोड दिएको बताउँदै अबको तीन वर्षमा याङ्ग्री र लार्के नदीको पानी ल्याउने गरी सम्बन्धित पक्षले पहल गर्नुपर्नेमा पनि जोड दिए । राष्ट्रपति विद्यादेवी भण्डारीले मेलम्चीको पानी काठमाडौं आउनु नयाँ वर्षको पूर्वसन्ध्यामा नेपाली जनताको लागि नयाँ उपहार भएको बताइन् । विकास निर्माणको काममा यदाकदा बाधा उत्पन्न हुनु नकरात्मक भएको धारणा राष्ट्रपति भण्डारीको छ ।

२२ वर्षपछि मेलम्चीको पानी काठमाडौं झरेपनि यसले काठमाडौंबासीको अहिलेको दैनिक माग भने पूर्ति गर्नेछैन । तथापि, काठमाडौंबासीलाई केही राहत भने मिल्नेछ । मेलम्चीसंगै गाङ्ग्री र लार्के नदीको पानी पनि छिट्टै काठमाडौंमा झार्न सम्बन्धित सबैले जोड दिदै आएका छन् । सरकारले पनि यसखाले प्रतिबद्धता जनाउने मात्रै होइन, कार्यान्वयनका लागि थप ठोस पहल गरेमात्रै याङ्ग्री र लार्के नदीको पानी पनि छिट्ट काठमाडौं आउन सम्भव हुनेछ ।