काठमाडौं, ५ पुस । प्रधानमन्त्री केपी ओली राष्ट्रपति विद्यादेवी भण्डारीलाई भेटेर बालुवाटार फर्किनु भएको छ । आइतबार बिहान मन्त्रिपरिषद् बैठक राखी संसद् विघटन गर्न सिफारिस गर्ने निर्णय गराएका ओली बैठक लगत्तै राष्ट्रपति भेट्न शीतल निवास पुग्नु भएको थियो । राष्ट्रपतिसँग करिब एक घण्टा छलफल गरेका ओलीले संसद् विघट गर्न सिफारिस गरेको पत्र राष्ट्रपतिलाई दिएको बताइएको छ। तर प्रधानमन्त्रीले संसद् विघटनको सिफारिस गर्ने पत्र राष्ट्रपतिलाई दिए/ नदिएकोबारे बालुवाटार स्रोतले खुलाउन चाहेको छैन। राष्ट्रपति निवासबाट फर्किएपछि ओलीले बालुवाटारमा आफूनिकट नेताहरुसँग परामर्श गर्ने बुझिएको छ।

प्रधानमन्त्री केपी शर्मा ओलीले पार्टीको आन्तरिक विवादलाई हतियार बनाउँदै संसद् विघटनको सिफारिस गरेपछि नेकपाका कार्यकारी अध्यक्ष प्रचण्ड निवासमा नेताहरू आकस्मिक छलफलमा जुटनु भएको छ । प्रचण्ड निवास खुमलटारमा वरिष्ठ नेता झलनाथ खनाल, माधवकुमार नेपाल, प्रवक्ता नारायणकाजी श्रेष्ठसहितका नेताहरू छलफलमा जुटेनु भएको हो । बैठकमा संसद् विघटन गर्ने ओलीका सिफारिस, पार्टीको स्थायी कमिटी बैठकलगायतका विषयमा छलफल हुने स्रोतले जनाएको छ । नेकपा स्थायी कमिटीको बैठक आजै दिउँसो १ बजेका लागि बोलाइएको छ ।

दुई अध्यक्षले पेस गरेको प्रस्ताव र संवैधानिक परिषद्‌सम्बन्धी अध्यादेशका विषयमा छलफल हुने कार्यक्रम रहे पनि एकाएक ओलीले संसद् विघटनको सिफारिस गरेपछि उत्पन्न अवस्थामा कसरी बैठक अघि बढाउने भन्ने विषयमा छलफल गर्न नेताहरू भेला भएका हुन् ।