काठमाडौं, २६ मंसिर । अर्थमन्त्री विष्णुप्रसाद पौडेलसँग नेपालका लागि फिनल्याण्डका राजदूत पर्टी अन्टिनेनले शिष्टाचार भेट गर्नुभएको छ । अर्थमन्त्रीलाई भेट्न राजदूत अन्टिनेन शुक्रबार दिउँसो मन्त्रालय पुग्नुभएको थियो ।

मन्त्री पौडेलका प्रेस संयोजक भुवन केसीकाअनुसार भेटमा अर्थमन्त्रीले नेपाल र फिनल्याण्डबीच सदैव सुखद र असल सम्बन्ध भएको र आगामी दिनमा थप सुमधुर सम्बन्ध विस्तारमा विश्वास व्यक्त गर्नुभयो । नेपालको विकासमा फिनल्याण्ड सरकारले गर्दैआएको सहयोगको लागि उहाँले धन्यवाद दिनुभयो ।

अर्थमन्त्री र राजदूतबीच द्विपक्षीय सम्बन्ध, विकास सहायता परिचालन, पर्यटन प्रवर्धन, लगानी अभिबृद्धि तथा कोभिड १९ महामारीको नियन्त्रण लगायतका विषयमा छलफल भएको केसीले जानकारी दिनुभयो ।

भेटमा राजदूतले सन् २०२१ देखि २०२४ सम्म फिनल्याण्डले नेपालको लागि गर्ने विकास सहायता रणनीतिबारेमा जानकारी गराउनु भएको थियो । राजदूतले नेपालसँग सहकार्य गर्दै सहायता अभिबृद्धि गर्दै जाने समेत प्रतिवद्धता जनाउनुभयो ।