काठमाडौं, ३ चैत्र । मोरङस्थित मनमोहन प्राविधिक विश्वविद्यालयले चिनियाँ राष्ट्रपति सी जिनपिङको पुस्तक धमिराले खाएको कारण जलाउनु परेको स्पष्टीकरण दिएको छ ।

चिनियाँ राष्ट्रपति सीको ‘द गभर्नेन्स अफ चाइना’ किताब शनिबार (फागुन ३०) विश्वविद्यालयले जलाएको थियो । सोही विषयमा चिनियाँ दूतावासमार्फत चासो देखाएपछि गृह मन्त्रालयले यसबारे कारबाही अघि बढाउन जिल्ला प्रशासन कार्यालय मोरङलाई निर्देशन दिएको छ । गृहको निर्देशनपछि मोरङ प्रशासनले अनुसन्धान अघि बढाएको छ । मोरङका प्रहरी प्रमुख एसपी कवित कटुवालले प्रशासनले छानबिन थालिसकेको बताए ।

उनले भने, “हामीलाई नै कारबाहीका लागि पत्र आएको होइन । प्रशासनले छानबिन गरिसकेको छ । छानबिनका क्रममा विश्वविद्यालयले धमिराले खाएका कारण पुस्तक जलाएको बताएका छन् ।

थप छानबिन हुँदै छ ।” छानबिनका क्रममा विश्वविद्यालयको निर्णयअनुसार नै पुस्तक जलाइएको खुलेको छ । चिनियाँ दूतावासले भने, नेपाल–चीन सम्बन्धलाई असर पुर्‍याउने किसिमको घटना भएको भन्दै चिन्ता व्यक्त गरेको छ । सोही चासोपछि गृह मन्त्रालयले अनुसन्धान थालेको हो ।