काठमाडौं, १७ भदौ । जापानी प्रधानमन्त्री सिन्जो आबेले आगामी दिनमा नेपाल(जापान सम्बन्ध थप विकसित हुने बताउनु भएको छ । बुधबार बिहान ट्वीट गर्दै आबेले नेपालका प्रधानमन्त्री केपी शर्मा ओलीलाई धन्यवाद ज्ञापन गर्नुभएको हो । आबेले चार दिनअघि आफ्नो स्वास्थ्यको कारण देखाउँदै जापानी प्रधानमन्त्रीबाट राजीनामा घोषणा गर्नुभएको थियो । उक्त समाचार सार्वजनिक भएपछि प्रधानमन्त्री ओलीले ट्वीट गर्दै आबेको शीघ्र स्वास्थ्य लाभको कामना गर्नुभएको थियो। प्रधानमन्त्री ओलीले आफ्नो ट्वीटरवालमा भन्नु भएको छ – तपाईं बिरामी भएको सुनेर दु ख लाग्यो। प्रधानमन्त्री आबे तपाईंको शीघ्र स्वास्थ्यलाभ र सु–स्वास्थ्यको कामना गर्दछु। तपाईंको बहुआयामिक नेतृत्वबाट नेपाल–जापान सम्बन्धमा धेरै फाइदा भएको छ।

उक्त ट्वीटलाई रिट्वीट गर्दै आबेले लेख्नु भएको छ – तपाईंका आत्मीय शब्दका लागि धन्यवाद प्रधानमन्त्री ओली, नेपाल–जापानको पुरानो सम्बन्ध आगामी दिनमा अझै विकसित हुनेछ भन्ने मेरो आशा छ।
६५ वर्षीय प्रधानमन्त्री आबेले शुक्रबार पत्रकार सम्मेलन गर्दै राजीनामा दिएका दिनुभएको हो । मैले जनताको लागि राम्रा निर्णय गर्न सकिनँ भने म प्रधानमन्त्री बन्न सक्दिनँ। मैले पदबाट राजीनामा दिने निर्णय गरिसकें उहाले पत्रकार सम्मेलनमा भन्नुभएको थियो ।